MATAPOS na naging matuninong si eleccion kan Mayo 14, 2007 sa Ciudad nin Naga alagad na-alarma an mga taga City Hall kan napalibotan nin mga miembros kan Regional Mobile Group (RMG) apesar na mayo man nin kahagadan an Comelec asin PNP Naga na kaipuhan an dagmang na mga awtoridad mientras na ginigibo an pag-bilang kan election returns kan City Board of Canvassers sa session hall kan Sanggunian Panlungsod.
Caption: OIC RD TIRA, PD MAPALO MAYO NANG RESPETO SA PNP NAGA - Si dating Chief of Police Benjamin Navarro (wala) kan policia kan Ciudad nin Naga asin Public Safety Consultant kan LGU Naga pig-congfrontar si P/Sr. Inspector Johnny Capalos kan Regional Mobile Group an saindang presencia sa compound kan City Hall apesar na matuninong na nagtapos si eleccion. Inako ni Capalos, team leader kan RNG na directiva sa sainda ni OIC Regional Director Sr. Supt. Agnanayo Balligi Tira asin Provincial Director Sr. Supt. Romeo Mapalo na bantayan an ginigibong canvassing kan Board of Canvassers apesar mayo sindang coordinacion sa Comelec asin PNP Naga.
Dai na pig-rerespeto ni Prov’l. Director Sr. Supt. Romeo Mapalo OIC Reg’l. Director Sr. Supt. Agnanayon Balligi Tira sinda nakakalangkaw na oficial envez an saindang pig-susunod iyo an pagpagamit sa politico sa Camarines Sur na dai naman pig-ngaranan, sabi pa kan sarong oficial kan policia digdi na habo na magpasambit kan pangaran.
Si Abogado Maico Julia Jr. Election Registrar kan Ciudad nin Naga asin maging si OIC Chief of Police P/Supt. Benjamin Suratos parejong nagpahayag na dai man sinda naghagad nin police assistance sa PNP Bicol.
Kan kaolayon ni retiradong Col. Benjamin Navarro asin dating jefe de policia kan PNP Naga si P/Sr. Inspector Johnny Capalos an namamayo kan sobra sa 32 na miembros kan RMG, pigpahayag na sinda pig-dispatsar ni OIC Regional Director Tira sa kahagadan ni Camarines Sur PNP Provincial Director
Si Navarro, Public Safety consultant kan City Hall nag-cuestion sa grupo kan RMG huli ta mayo nin nangyayaring kariribokan sa City Hall asin sa Naga mientras na nagpapadagos an canvassing.
Sinabi ni Suratos na mayong coordinacion sa saiyang oficina an pigdispatsar na RMG.
Naghihinakit na an PNP Naga huli ta pati na an deployment kan mga miembros kan PNP hali sa Bicol PNP asin pagbugtak nin mga check point sa Naga mayo nang ginigibong coordinacion si Tira asin Mapalo.
Si Alcalde Jesse M. Robredo nagtutuyaw sa liderato kan PNP sa Bicol sa pamamayo ni Tira asin ki Mapalo na nagpapagamit sa politico. Tubod an mga oficiales local digdi na an orden kan pagdispatsar nin miembros kan RMG sugo kan politico sa Cam. Sur.
Manga alas 11:00 nin banggi kan Martes nag-arabotan an RMG lunad sa 6x6 truck. Sinabi ni Capalos na sinda pigsugo sana ni Tira na magmantenir kan pace orden sa City Hall apesar na mayo man nganing nangyayaring kariribokan na dai man ngani hinagad kan Comelec asin kan PNP Naga.
Si Gobernador L-Ray Villafuerte kan Camarines Sur haloy nang pighahagad ki PNP Chief Director General Oscar Calderon na ribayan na sa puesto si Mapalo antes pa kan eleccion huli kan envuelto sa partisan politics alagad mayong accion maging an oficina ni Comelec Chairman Benjamin Abalos.
Si Mapalo sa dai mahahaloy an maretiro na sa servicio ngonian na bulan nin Mayo 2007 kaya saiya sanang pighahalat an directiva, inabot nin eleccion ban kaya ngani nagpadagos siya sa puesto huli ta mayo man nin relieved order.
