MATAPOS kan eleccion local asin nacional kan Mayo 14, 2007 an Commission on Election (Comelec) sunod naman na pig-aandam iyo an sabay na eleccion sa barangay asin Sanggunian kabataan sa Octubre 29, 2007.
An Acta Republica 9164 nagsusugo sa pagconducir nin sabay na eleccion kan SK asin oficiales de barangay asin ini narecibe na kan mga election officer antes pa kan pirilian kan Mayo 14.
Alagad an ibang mga oficiales kan Liga ng mga Barangay duda kun ipapadagos an sinambit na eleccion mientras na magdedefende naman sa congress kun ma-enmienda kan RA 9164 na isibog an eleccion huli ta natatapos palang si local asin nacional na pirilian kun haen sa laog nin sarong taon magkaka-igwang duwang veces na eleccion.
Si Alex Marpuri, oficial na parapahayag kan Comelec Camarines Sur nagsabi na kun sinda an hahapoton dagos an sinambit na eleccion base sa sinambit na Acta Republica.
Sinabi ni Marpuri na saindang piglalaoman na an election guidelines sa barangay asin Sanggunian Kabataan piglalaoman na maabot sa mga oficina local hali sa saindang oficina central sa huring semana kan Julio 2007.
An eleccion dapat ginibo kan nagtalikod na taon, alagad pig-enmiendahan an ley huli ta an pigtawan nin prioridad iyo an preparacion si eleccion kan Mayo 14.
Kabali sa mga actividad sa sinambit na eleccion na 120 dias antes kan eleccion matalaan nin registracion kan mga calificadong votantes nganing maka-participar sa pirilian sa Octubre 29, sabi pa kan oficial na parapahayag kan Comelec.
Napag-araman sa oficina regional kan Comelec na dai pa ninda aram kun igwa nin awad-awad na fondo an gobierno para sa sinambit na eleccion huli ta natatapos palang si eleccion kan Mayo 14 kaya ngani an ibang mga oficiales kan Liga nang mga Barangay dai pa nakaka-cierto kun dagos an eleccion.
An eleccion sa barangay asin SK, non-partisan alagad dai man giraray nahihilom na may mga politico an nagbubugtak kan saindang sadiring candidato nganing makaseguro nin lider sa barangay para sa masunod naman na ehercicio political.
Mientras tanto, si Liga President Domingo Briones kan Camarines Sur dai pa na-declara kun siya macandidato giraray huli ta saro siya sa magiging staff ni Presidential son, congressman election Diosdado “Dato” Arroyo sa congress.
