NASIRIPAN si nagkaperang miembros kan intelligence group kan militar sa Ciudad nin Naga kan gibohon si pag-marcha kan mga obreros na pinangenotan kan KMU asin iba pang mga militanteng grupo sa pag-observar kan kaaldawan nin mga obreros kan Mayo 1, 2007.

Caption: Rally kan Obreros - Sobra sa Tres Mil na mga participantes gikan sa apat na distrito kan Camarines Sur nagtiripon sa Ciudad nin Naga kan Mayo 1, 2007, sinabayan pag-indorsar nin mga candidatong Senator kadakli hali sa Genuine Opposition.

        Kan nakatiripon na si mga raliyista nag-alerto sa Plaza Quezon si Jariz Vida, lider kan Bayan Muna nagpatanid sa mga participantes na dai mag-surowayan an grupo nganing makalikay an arin man sa sainda na mawara mientras na may nakapalibot na naka-civilian na awtoridad.

        Sa sinambit na rally kabali pa sa natuyawan iyo an dai nareresolveran na mga incidente nin extra judicial killings sa kabikolan na sobra na sa sanggatos an mga victima asin ini pigsasahot sa establisimiento militar.

        Naging matuninong si pag-marcha sa mga mayor na calle kan centro kan ciudad sagcod na ginibo an rally sa Plaza Quezon, alagad si delegacion na hali sa premir distrito binagat kan mga soldados kan gobierno sa Sipocot, Camarines Sur.

        Sobra sa tres mil si nagparticipar gikan sa apat na distrito kan Camarines Sur, narisa na afuera kan kahagadan sa administracion ni GMA na aprovaran na an P125 na legislative wage increase an pag-campania na kan grupo sa saindang mga pig-iindorsar na party list asin walong candidatong senador na kadakli hali sa lineada kan Genuine Opposition.

        Si Jaris Vida, lider kan Bayan Muna sa Camarines Sur nagcondenar kan ginibo kan miembros kan Philippine Army sa pag-bagat kan grupo nin mga paraoma asin trabajadores na haling Lupi asin Sipocot asin inulang na pagabantehon pasiring sa Naga na iyo an centro kan rally.

        Kan celebracion kan Labor Day an PNP Camarines Sur nasa red alert.

        Dawa na ngani pig-provaran na sabotajihon kan militar alagad kadakul man giraray si naka-atendir hali sa apat na distrito, sabi pa kan lider kan Bayan Muna.

        Namumundo an trabajadores huli ta mayong mensaje si GMA sa ano man pag-implementar kan wage increase sa privadong sector mientras na pig-pugol an pag-aprovar sa congreso kan P125 na legislative wage increase.

        Kasabay kan ginibong rally an mga lider kan militante saindang pig-indorsar an mga candidatong senador kan GO na kinababalihan ninda; Loren Legarda, Manny Villar, Alan Peter Cayetano, Chiz Escudero, Koko Pimentel, sa TU si Joker Arroyo asin si Ralp Recto asin Kiko Pangilinan.