An Naga City Peace and Order Council (NCPOC) nag-condenar sa nagretiro pa sanang Provincial Director kan Camarines Sur asin sa OIC Regional Director kan PNP Bicol sa isyu sa ilegal na pag-arestar asin pagsahot na envuelto sa ilegal na droga an 16 na miembros kan PNP Naga sagcod nang ilegal na pig-detiner sa Camp Simeon Ola sa Ciudad nin Legaspi.
An resolucion ina-provaran kan NCPOC sa ginibong regular na miting kan Mayo 29, 2007 na pigpadrenohan ni Consejal Julian Lavadia Jr. asin nakatalaan na magpadara nin copia sa Senate Committee on Public Order and Security nganing dagos nang hagadon na magcondicir nin senate hearing sa mga pang-abuso kan halangkaw na official kan PNP na sinda OIC Regional Director Sr. Supt. Balligi Agnanayon Tira asin sa naretiro pa sanang Provincial Director Sr. Supt. Romeo Mapalo.
An NCPOC na componido nin manlaen-laen na sectores bilog na nagsuporta sa resolucion sagcod na ina-provaran sa besperas kan compleanyo ni Mapalo kan Mayo 30.
Mamundo man si Mapalo huli ta iyo pa an regalo sa saiyang compleanyo kasuodma alagad nagsayuma naman siya magpaluwas nin negativong comentario envez kun igwa man kan sinambit na resolucion contra sa sainda ni Tira, deretso kan NCPOC mientras na an ginibo ninda sa 16 na miembros kan PNP Naga pig-conduciran nin investigacion sa mga report na envuelto sa ilegal na droga.
An nagretiro nang oficial kan PNP sinangatan nin casong illegal detention asin caso administrativo sa Ombudsman kan mga afectadong polis, alagad sinabi ni Mapalo dai pa siya nakakarecibe kan copia kan reclamo.
Kabali sa mga pang-aabuso na ginibo ninda Tira asin Mapalo iyo an mga ginigibong deployment kan mga miembros kan Regional Mobile Group na mayong coordinacion sa PNP Naga.
An afectadong polis kan PNP Naga nagrereclamo huli ta malinaw na victima sinda nin human rights violation kan mga oficial man sana kan PNP huli ta acusado sa ilegal na droga apesar na mayo man nganing oficial na reclamo asin ginibo ini duwang aldaw antes kan eleccion sa posibleng katuyuhan na mabawasan nin fuersa an ciudad sa panahon na gayo kan eleccion nganing ma-justificaran an deployment kan RMG.
Sinda nakaluwas sana sa ilegal na pag-detenir kan magsangat nin petition for habeas corpus sagcod na tinugotan kan RTC Branch 19 sa ciudad nin Naga na nag-susugo ki Tira asin Mapalo na butasan na an mga polis na ilegal na pig-pull-out sa Naga.
Duda an PNP Naga na nagpagamit sa sarong poderosong politico an nagretiro nang PD asin an OIC Regional Director, alagad sinda na ngonian an naiipit huli ta nag-aatubang nin caso criminal asin administrativo.
