Pili, Camarines Sur -– An Commission on Election sa Camarines Sur nagpahayag na mayong nangyaring pagpalyar kan eleccion sa barangay asin Sanggunian Kabataan digdi sa provincia dawa na may manga escuelahan na lantop pa nin tubig baha, alagad may sombong na naka-abot sa Bicol Mail na barakalan nin voto asin flying voters.
Kabali sa manga banwaan na afectado pa kan tubig baha kan panahon kan pirilian matapos kan active low pressure sa Camarines Sur iyo an nagkaperang mga barangay kan Nabua, Baao, Bato, Buhi, Ciudad nin Iriga. Huli kaini an nangyari sana na dai nakapoon pag-exactong alas siete nin aga inabot nin alas diez alagad nadagos man giraray si eleccion. Si iba nagbalyong lugar ngani sanang maseguro na madagos an pirilian.
Ini an manga pahayag ni Abogado Noriel Badiola, provincial election supervisor kan Comelec Camarines Sur mientras na dai man giraray nahali si dating problema si pagkakawara nin manga pangaran nin votantes kaya dai naka-participar sa eleccion.
Sa barakalan nin voto dapat may magsangat nin caso sa pagbalga kan Omnibus Election Code kun igwang manga nadakop na kun haen nangyari sa Canaman asin Calabanga, Camarines Sur.
Sa report kan policia si Christian Abel Concepcion, nadakop ni barangay capitan Pepito Sahayon kan Haring, Canaman na may manga dara nin pinatos na groceria na soboot ibabakal nin voto asin an suspechado pig-turn over sa PNP.
Igwa man nin kaparejong incidente sa Ciudad nin Iriga asin sa iba pang manga banwaan, alagad dai na nagreclamo envez pigpa-abot na sana sa media.
Sa Calabanga, Camarines Sur si Chief of Police Teodoro Bolitic nagsabi na nagkaperang mga reclamo sa barakalan nin voto alagad an nagrereclamo pig-indorsar niya sa oficina kan Comelec.
Sa banwaan nin Bato, Camarines Sur si alcaldesa Jannete Bernaldez nagsombong na an mga residentes kan saiyang barangay San Rafael nagrereclamo kan mga pina-votong flying voters apesar na dai man ngani beristo asin dai aram kun saen na zona nag-eerok alagad napag-araman na mga taga Pili, Camarines Sur an nadiscobreng 7lng pangaran.
Kabali sa nagrereclamo si barangay capitan Eddie Cangayo na dai ngani namimidmidan, sabi pa kan alcaldesa.
An suspecha ni Bernaldez na an nasa likod kan paghakot nin flying voters iyo an sarong nadaog na candidatong alcalde sa saindang banwaan alagad nagsayuma nang ngaranan.
Pigconfirmar kaini na sinda nakatalaan na magsangat nin reclamo sa Comelec nganing tawan nin eleccion asin matabang siya mientras na siya taga barangay San Rafael.
Sa PNP provincial office, sinabi ni P/Chief Inspector Cerilo Trilles pamayo kan PCR na heneralmente naging matunining si resulta kan eleccion kan Octubre 29 sa 35ng banwaan asin ciudades kan Naga asin Iriga. Tulo sana an pigsangatan nin caso sa pagbalga kan gun ban alagad ini nagkadarakop sa periodo kan campaign period.
Nagtarabangan an Philippine Army asin PNP Camarines Sur sa pagmantenir kan pace orden orog na si mga lugar na declarado bilang mga areas of immediate concern.
