Pakatapos kan active low pressure area kan nakaaging Sabado sa Bicol na nagresulta nin manga tubig baha sa Ciudad nin Naga asin sa iba pang manga banwaan igwa pang nagbabantay nin sagcod sa anom na bagyo sa Philippine area of responsibility (PAR),.susog sa Philippine Atmospheric, Geophysical and Astronomical Services Administration (Pagasa).

        Si Alfredo Consulta, weather forecaster kan oficina local kan Pagasa sa Camaligan, Camarines Sur nagsabi sa Bicol Mail na an anom na manga bagyo iyo na an huring pueding maglaog sa PAR, alagad dai paman masabi kun pera an posibleng maglamasa sa Bicol.

        An anom na bagyo na pigngaranan ni Consulta iyo an manga minasunod; Kabayan, Lando, Mina, Nonoy, Onyok, asin Pedring mientras na an pinakahuri iyo sinda Ineng asin Juaning na nakaluwas tulos sa PAR.

        Nasa 25ng manga pangaran nin bagyo an nasa listahan kan Pagasa asta sa letrang V, alagad sampulo na an nakalaog asin pigtutubodan na l7ng bagyo an posibleng kagabsan asta sa huring semana kan Deciembre 2007, sabi pa ni Consulta.

        Sa manga enot na nag-aging bagyo ngonian na taon sa PAR mayo nang supertyphoon na naglamasa sagcod sa sinusurat an baretang ini arog kan bagyong Melinyo asin Reming kan nagtalikod na taon.

        Sinabi pa kan Pagasa sa ngonian dahil sa efecto kan duros amihan asin ining malipot na panahon nagdadara nin manga pagbulos nin uran. Ini pa an nagbibilog nin tropical cyclone maski dai magrani sa kadagaan, nagdadara pa nin pagbagsak nin uran na namamatian sa rehiyon Bicol.

        An amihan, segun ki Consulta nangyayari sa manga bulan nin Octubre asta Deciembre asin puedi pang mag-abot sa bulan nin Enero sagcod Pebrero, an duros kaini gikan sa kadagaan kan China bandang Siberia kaya an duros na amihan makusog kun icocomparar sa duros habagat.

        An habagat maharasahas an duros ini gikan sa may bandang Indian ocean, sabi pa ni Consulta.