Si Provincial Director P/Sr. Supt. Romeo Tambungui kan Camarines Sur PNP provincial office tubod na bakong insulto sa saiyang liderato an magkasuhay na task force kan Capitolyo Provincial asin City Hall nganing iyo na an malansar nin campania contra sa centralisado nang operacion kan jueteng sa Camarines Sur kun dai kayang mapuho kan PNP.
Sa entrevista kan BM sinabi ni Tambungui na kaipuhan an manga na-aarestar na envuelto sa ilegal na sugal i-turn over sa PNP huli ta an arin man nganing civilian pueding mag-dakop kan manga criminal sa paagi kan citizen arrest.
Nagpasalamat pa an provincial director sa Capitolyo Provincial kan Camarines Sur asin City Hall kan Ciudad nin Naga mientras na an prioridad kan PNP iyo an campania laban sa insurgencia, droga asin iba pang criminalidad.
Dakulang bagay an pagtarabangan sa campania sa ilegal na sugal, sabi pa kan provincial director alagad pinahmotikan kaini na mayo pa sindang nadadakop asin sa record sagcod kasuodma igwa nang madakop na 26 na correador.
Si gobernador L-Ray Villafuerte nagpatanid na ki Tambungui na pakatapos kan eleccion kan Octubre 29, 2007 kun mayong ginigibo na mapundo an ilegal na sugal na lakop na sa apat na congressional district malansar na nin pananakyada sa manga gugoan nin jueteng an Provincial Anti-Crime Task Force.
Si alcalde Jessie Robrero an saindang special task force iyo an Public Safety Office (PSO) mala ngani apat na an na-arestar na correador sagcod na sinangatan na nin caso sa corte.
Nagsugo si Robredo sa PSO na lapagon an mga envuelto sa ilegal na sugal na jueteng nganing ipaheling ki Tambungui na activo na an operacion kan jueteng sa tahaw kan pahayag na mayo man nin jueteng sa Naga.
Sa lado kan provincial director pigconfirmar kaini na kun may jueteng iyan guirella sana man. Alagad dai man conbensido an mga oficiales kan provincia asin City Hall sa pahayag kan PD huli ta lakop na ngani sa apat na congressional district kan Camarines Sur.
Nagtutubod an sinambit na oficiales local na kun nagdadanay liwat an jueteng huli ta ini may proteccion sa halangkaw na oficial kan PNP asin politico.
