Nagka-igwa nin dialogue an Camarines Sur Bankers Club (CSBC) asin PNP Camarines Sur sa pagtarabangan nganing dai na mangyari an sunod-sunod na robbery hold-up sa Ciudad nin Naga asin maging sa Camarines Sur matapos kan incidente sa Naga na an manga victima kliente nin bangko.
Alagad sa mensaje ni PNP Provincial Director P/Sr. Supt. Romeo Tambungui sa 43 na mga manager nin bangko sa pamamayo ni Mariano O. Aureus Jr bilang presidente. kan CSBC na nag-aratendir sa sinambit na dialogue na ginibo kan Martes (Noviembre l3) sa conference room kan Cam. Sur PNP Office, nagpatanid an jefe kan PNP sa provincia na dai sa gabos na oras magtiwala sa saindang security guard na pueding kasabuat man sana sa mga robbery hold-up.
Caption: MANGA BANGKERO, PNP NAGHARAMPANGAN - Si dialogue na ginibo sa PNP Provincial Office kan Cam. Sur na haros 100 por ciento na pig-atendiran nin manga manager nin bangko sa Naga asin Camarines Sur. Sa retrato sa walang grupo si PD P/Sr. Supt. Romeo Tambungui, (wala) Mariano O. Aureus Jr. (tahaw) presidente kan CSBC asin si Deputy PD P/Supt. Benedicto Pintor, sa atubangan ninda an manga bank manager asin representante na hali sa apat na congressional district kan Camarines Sur.
Pig-osipon niya na kan dating destino siya bilang oficial kan CIDG sa Camp Crame sa saindang mga ginibong investigacion sa mga incidente nin hold-up sa bangko igwang envueltong security guard, alagad bako man gabos igwa man sa saindang toltol sa servicio.
Na-alarma na an CSBC matapos kan incidenteng robbery hold-up na nangyayari dawa aldaw asin sa atubangan kan publico arog kan incidente sa Jollibee, Panganiban Naga kan an armored cars kan MetroBank kan makoa kan cuarta nganing ideposito alagad binadil gadan an security escort kan bangko asin iredo an security guard kan fastfood chain. Ini afuera kan enot na incidente na victima an kliente kan Bangko de Oro asin RCBC.
Sa kaparejong paghaharampangan si P/Chief Inspector Perfecto de Lima Jr. jefe kan operational command pigtukdo an mapadapit sa tips on bank robbery sa panahon na nangyayari ini asin pakatapos kan incidente. Saiyang pigrecomendar na mag-instelar nin surveillance camera afuera kan dati nang robbery alarm.
CSBC naghagad nin police visibility
An CSBC nagpasar nin resolucion no. 2007-0l0 na naghuhurot ki PNP Chief Director General Avelino Razon Jr. na mag-destino nin dugang na polis sa Ciudad nin Naga huli ta pigsasamantala kan mararaot na elemento an kakulangan na nin police visibility kaya sunod-sunod an mga nangyayaring criminalidad sa ciudad.
An resolucion na firmado na ni Aureus asin certified correct ni CSCB Secretary Arleen Mariano, pigpadara na sa Camp Crame.
100 na miembros kan PNP hahalion ano man na oras
Sa open forum na-ihapot sa provincial director kun sagcod nuarin an pigdestinong l00 na miembros kan regional mobile group sa Naga hali sa Camp Semion Ola sa Ciudad nin Legaspi, ini magdedefende sa Bicol PNP kun sagcod sa perang semana o bulan ta defende man giraray sa situacion kan pace orden, sabi pa ni Tambungui.
Pigbuyagyag niya na dawa sain na manga police station kulang nin destinong policia mientras si dating standard na sarong polis cada 500 na populacion an nangyari naging na sanang sarong polis sa cada l,450ng persona. Sa Naga PNP igwa sanang l20ng miembros hinalian pa nin l4ng polis na inapod sa Camp Crame.
Hinagad na iimplementar an no plate no travel policy particularmente sa motorista, alagad dai man nag-asegurar an PNP envez pigpasa sa LTO huli ta ini yaon sa trabajo kan agenciang ini asin makaka-estricto sana sinda kun deputized kan LTO.
Mayong organisadong crimen sa CamSur
Dai tubod an PNP Camarines Sur na may organisadong crimen sa provincia envez ini manga grupo-grupo sana. Sinabi pa na macoconsiderar na matuninong pa an Camarines Sur asin kun sa incidente nin hold-up sa bangko mayo pang nangyayari digdi afuera sa manga pag-viaje.
2ng casong robbery hold-up pigtuturogan sa Naga PNP
Sa isyu kun nuarin mareresolveran an nangyaring hold-up sa jollibee asin sa kliente kan Bangko de Oro asin RCBC, an Naga PNP na presente sa dialogue an dai nagtao nin timetable halaton na sana kun nuarin isasangat an caso sa corte. Nagpapadagos pa an investigacion asin igwa nang angulo kun siisay an manga suspechado alagad mayong malinaw kun nuarin.
Kun igwang conflicto sinda OIC RD Balligi Agnanayon Tira asin alcalde Jessie Robredo kan Ciudad nin Naga, sa lado ni PD Tambungui sinda mayong problema kan alcalde asin igwang mga ginigibong coordinacion sagcod may minsan nagkaka-olay pa an duwa. Sinabi ni PD na pigsabihan niya an mga polis sa provincia na magtrabajo sana.
