Pili, Camarines Sur –- “Jueteng free” an Camarines Sur kun tutubodan an paliwanag ni PNP Provincial Director Romeo Tambungui sa Sanggunian Panlalawigan na nag-gamit pa siya nin power point sa pagpaluwas kan lista nin mga banwaan na firmado kan alcalde, Chief of Police asin parokia kan simbahan an certificacion na mayong ilegal na sugal na jueteng sa saindang jurisdiccion.
Alagad an alegacion kun igwang jueteng iyan guerilla sana asin yaon sa bukid na barangay an gugo na dificil na malapag kan miembros kan PNP huli ta kulang na ngani an personajes asin an saindang prioridad an campania sa insurgencia asin sa ilegal na droga.
Si Tambungui naging visita sa ginibong session regular kan SP kan Camarines Sur kan Martes (Noviembre 20) nganing hagadan nin paliwanag kan gobierno provincial ta sa saiyang liderato nabuhay liwat an jueteng matapos nin duwang bulan kan siya mag-asumir sa PNP provincial office na saiyang pig-ribayan si OIC PD P/Supt. Benedicto Pintor.
Pig-report kaini na sa saindang campania contra sa jueteng 46 na correadores an saindang na-arestar asin 5 mil pesos na taya sa sugal an saindang nasamsam.
Dai tulos na simbag kan PD an enot na kahapotan sa controvercial na jueteng envez pigpaliwanag an saiyang mga acomplisimiento sa PNP provincial office sa campania sa criminalidad, pinahuri niya an kasimbagan sa nabuhay na sugal.
Jueteng Free Certificate
Sa saiyang pig-presentar na listahan nganing provaran niya na “jueteng free” an Camarines Sur sa premir distrito an mga municipio na nagfirma an mga alcalde, jefe de policia asin parokia sa certificacion na mayong jueteng iyo an Ragay, Del Gallego, Sipocot, San Fernando asin sa Cabusao an parokia dai nagfirma afuera kan COP asin alcalde.
Sa segundo distrito an mga alcalde, parokia asin COP na nagfirma kinababalihan
Kan Magarao, Milaor, Ocampo, Pili, mientras na an Bombon asin Calabanga an magkasuhay na parokia dai nagfirma sa certififcacion.
Sa tercer distrito an mga nagfirma sa kaparejong certificacion iyo an mga alcalde, jefe de policia asin parokia kan mga municipio kan Caramoan, Garchitorena, Siruma, Lagonoy, asin Tinambac alagad an parokia kan Goa dai napatubod dai nagfirma.
Sa cuarto distrito nagfirma sa kaparejong certificacion iyo an mga alcalde, jefe de policia asin parokia kan mga municipio kan Baao, Balatan, Bato, Buhi, asin Bula.
Arin man na grupo pueding mag firma sa certification na may jueteng sa CSur
Hinapot ni Vocal Angel Naval an provincial director kun may grupo na magfirma nin certificacion na may jueteng sa arin man na banwaan ini saindang aakoon. Alagad an efecto kaini kun ma-provaran na igwa nin operacion kan jueteng sa sarong banwaan alagad may certificacion an PNP, LGU, asin simbahan na mayo kan sinambit na sugal puedi sindang sangatan nin caso susog sa acta republica 9287 na mas magabat na an castigo kun maprovaran sa corte.
Sinabi kan PD na kabali sa hahagopon nin castigo susog sa RA 9287 iyo an capitalista, manager, coordinator asin protector na icoconsiderar digdi si nagfirma sa certificacion na may jueteng sa saindang lugar alagad baliktad envez makusog an tarayaan.
PD pabor sa legalisacion kan jueteng
An oficial kan PNP nagpabor sa kahurotan ni vocal Ruperto Alfelor na gibohon na lugod na legal an sinambit na sugal huli ta dai man sana napopondo ta segun ki PD ini panahon kan kan castila mala ngani saiyang pig-onambitan si Dr. Jose Rizal nagtataya man sa sinambit na sugal.
Segun pa sa saiya dapat magka-igwa na nin small town lottery sa Camarines Sur sa pagtubod niya na ini iyo an magadan kan jueteng.
Pangako vs Jueteng
An pamayo kan PNP kan mag-asumir sa puesto nagpangako ki Gobernador L-Ray Villafuerte na mayong mangyayaring jueteng sa laog kan saiyang liderato, alagad dai man na-utob sagcod na pungot na sa saiya an gobernador.
Pigtutubodan na igwang pig-aalanganan an provincial director na halangkaw na oficial kan PNP sa Bicol kaya dai niya kayang mapapundo an sugal.
Caption: DEPUTY DIRECTOR GENERAL KAN PNP CAMP CRAME PIGSUGO NI GMA SA NAGA. Sa retrato nasa kabesira si Dep. Dir. Gen. for Operation Reynaldo Valeria (sa tahaw), kataid niya sa too si bise alcalde Gabby Bordado asin si alcalde Jess Robredo mientras nasa atubangan ninda an lideres kan manlan-laen na sectores na nag-confirmar na sinda nagfirma sa open letter ki GMA contra ki OIC RD Balligi Tira kan Bicol PNP asin ki OIC COP Amor Macoy kan Naga PNP, huli kan mga controvercia sa kapabayaan sa pagmantenir kan paz y orden. Si Valeria pigsugo ni GMA bilang accion sa sinambit na open letter asin aramon an mga nangyayari sa ciudad sa isyu contra sa PNP. An oficial kan PNP nagpangako na riribayan na si OIC COP Macoy sa puesto asin nag-tugot sa kahagadan kan alcalde na palawigon pa sagcod sa Deciembre 31, 2007 an 100 na miembros kan RMG kan Camp Semion Ola na pigpadara sa Naga PNP matapos kan mga sunod-sunod na robbery hold-up sa business district.
