Si OIC Chief of Police P/Supt. Amor Macoy an mapatos-patos na sa Naga City Police Station asin naghahalat nalang kan directiva hali sa Camp Crame kan orden kun nuarin siya hahaklason sa puesto mientras na mayo pa an maribay na OIC COP.
Sarong semana na an pangako kan Camp Crame na riribayan na si OIC Macoy, alagad mayo pa nin resulta sagcod sa ngonian.
An PNP Camp Crame iyo mismo an nag-asegurar sa City Hall asin sa mga lideres sectores na nagfirma sa open letter ki GMA contra ki Macoy sa kapalpakan sa magmantenir kan paz y orden asin contra sa pamayo kan Bicol PNP.
Si PNP Director General for Operation Reynaldo Valeria, na pigsugo ni Presidente Gloria Macapagal-Arroyo na mag-digdi sa Naga kasimbagan sa open letter kan ciudad asin kan mga lideres sectores nganing iyo mismo an mag-aram kan problema sagcod nang maka-olay an mga naka-firma sa open letter nagpangako na dapat nang ribayan si Macoy mientras na dai pa nakaka-sumiter nin limang mga pangaran nin oficial kan PNP bilang nominees na pipilian ni Alcalde Jesse M. Robrero
Nagdecicion an halangkaw na oficial kan Camp Crame huli kan mga nagrurolawasan na informacion contra sa liderato kan OIC COP hali sa manlaen-laen na sectores na pighampang ni Valeria sagcod na saindang pig-osipon na dai sinda pig-fuersa na magfirma sa open letter huli ta antes nagfirma nagconsulta pa sa saindang mga miembros.
Ini saindang pigsabi ki Valeria huli ta nag-aacusar si OIC Regional Director Balligi Agnanayon Tira kan Bicol PNP na pigfuersa sinda kan City Hall na magfirma sa sinambit na open letter.
Sa kaparejong miting hinagad ni Robredo na kaipuhan imantenir pa sagcod sa Deciembre 3l, 2007 an maabot sa sanggatos (100) na miembros kan regional mobile group sa Naga na pig-dugang na fuersa kan Bicol PNP matapos kan sunod-sunod na mga incidente nin robbery hold-up sa central business district l.
An oficial kan Camp Crame tulos man nagseguro sa jefe ejecutivo local sagcod na pigsurat sa papel nganing dai malingawan asin sugoan an Bicol PNP na dai muna halion sa Naga an sinambit na elementos kan policia.
Sa planong pag-ribay ki Tira dai pa nagseguro si Valeria huli ta an decicion magdedefende sa PNP Chief Dir. Gen. Avelino Razon Jr. Dai palang nahahaloy sa entrevista ki P/Supt. Eliezer Bron, oficial na parapahayag kan Bicol PNP sa Camp Semion Ola sa Ciudad nin Legazpi, sinabi kaini na posibleng dai na mahaloy sa puesto si Tira asin naghahalat na sana kan directiva saindang higher command.
