An Naga City Police Station magiging nang District Command dai na mapasakop sa Camarines Sur PNP Provincial Office envez an directang supervicion hali na sa Camp Semion Ola kan Bicol PNP sa Ciudad nin Legaspi. An bentaje kaini kun pugol nin politico an provincial director kan provincia dai na pueding paki-aram an district command particularmente kun igwang conflicto sa politica an pamayo kan Capitolyo Provincial asin kan City Hall.
Si Consejal John Bongat chairman kan committee on public safety kan Sanggunian Panlungsod nagsabi sa Bicol Mail na an resolucion naghahagad gibohon na district command an Naga PNP pigpadrenohan ni Consejal Jose Tuason na dating jefe de policia kan ciudad na ngonian miembro na kan consejo local. Sa miting kan Peace and Order Council kan ciudad kan Martes na hapon si Tuason iyo an natukahan na mag-follow up kan saindang kahurotan sa PNP Camp Crame.
Kun ma-aprovar kan Camp Crame madali na an ano man na kahagadan huli ta directa na sinda sa Bicol PNP envez na mag-agi pa sa PNP provincial office na saro pa sa nakaka-abala na pueding ulangon pa kan Provincial Director orog na kun ini kapot nin politico na contra partido sa mga oficiales local kan ciudad.
An POC na an mga miembros hali sa manlaen-aen na sectores kan ciudad sa pamamayo ni alcalde Jesse M. Robredo burongyog na nag-aprovar kaini huli ta bako lang sa presenting administracion an makiki-nabang envez sa mga masunod pang matukaw na oficiales kan City Hall.
Si Deputy Director General for Operation Reynaldo Varelia kan maki-atubang sa mga oficiales local asin sa lider nin manlaen-laen na sector nagpangako na tatabangan niya na ma-aprovaran kan Camp Crame an resolucion kan POC.
Kabali pa sa bentaje kaini iyo na pueding dugangan an miembros kan kan Naga PNP na sa ngonian igwa sana nin regular na miembros na maabot sa l20ng polis.
Sinabi ni Tuason na pueding ma-aprovaran an saindang kahagadan huli ta an Ciudad ngani nin Lapu-Lapu pig-convertir sa district command an saindang police station apesar na mas dakula pa ngani an Naga.
Mientras tanto, piglalangkag na kan POC an pangako ni Valeria na riribayan na si OIC Chief of Police P/Supt. Amor Macoy na haloy nang pigmamawot kan ciudad na magbugtak na nin bagong fullfledged na COP.
Sagcod sa ngonian maging an oficina ka kan alcalde dai pa maaraman kun nuarin maabot an idedesignar na OIC COP mientras na dai pa nakakapili nin permanteng jefe de policia.
