Camp Semion Ola, Ciudad nin Legaspi – Sisipaon na si P/Sr. Supt. Balligi Agnanayon Tira bilang OIC Regional Director kan Bicol PNP antes mag-abot an Noviembre l5, 2007 mala ngani kan Martes (Noviembre 6) pina-report na sa Camp Crame sa Quezon City, matapos magluwas an Open letter ki GMA na firmado ni alcalde Jesse M. Robredo, Arsobispo Leonardo Legaspi kan Caceres asin iba pang manga sectores kan Ciudad nin Naga contra saiya asin ki OIC Chief of Police Amor Macoy.

Caption: Bicol PNP nagpadarang dugang na manga polis sa Naga City Police Station - Maabot sa 100 na miembros kan Regional Mobile Group (RMG) hali sa Camp Semion Ola, Ciudad nin Legaspi. Sugo kan controvercial na OIC RD Balligi Agnanayon Tira nganing magtabang sa campania sa paz y orden asin sa ilegal na droga, alagad halawig na an duwang semana na magtenir sinda digdi huli ta ibabalik man sana sa Ciudad nin Legaspi. Sa tahaw si OIC COP P/Supt. Amor Macoy nagtataong instruccion kan mission kan bagong isaltang polis na may manga ranggong Police Officer I (PO1).

        Afuera kan sinambit na open letter ki GMA na nagluwas sa Bicol Mail kan Noviembre l, 2007 an League of the Municipalities of the Philippines Camarines Sur chapter asin si Gobernador L-Ray Villafuerte an naghagad na ki Presidente Gloria Macapagal-Arroyo asin ki Interior Secretary Ronaldo Puno na dapat ribayan na an OIC RD huli kan basang na pagharali kan manga jefe de policia na dai lamang nin coordinacion sa afectadong alcalde.

        Sa entrevista kan Bicol Mail ki P/Supt. Eliezer Bron, oficial na parapahayag kan Bicol PNP sa paagi nin telepono sinabi kaini na pueding matang-gal na sa puesto asin andam maghali sa Bicol PNP si Tira.

        Si Tira, nag-asumir sa Bicol PNP antes kan eleccion kan Mayo l4, 2007 asin may anom nang bulan nagtutukaw bilang OIC RD digdi sa Bicol. Susog sa civil service law an OIC pueding maglawig sana nin sarong bulan huli kaini dai na mahahali an peligro na ribayan na si Tira nin fullfledged na RD, naghahalat na sana siya nin directiva, sabi pa ni Bron.

        An open letter ki GMA contra sa OIC RD asin OIC Chief of Police Amor Macoy kan Naga PNP huli kan manga pang-aalamuso kan mga miembros kan policia kan ciudad sagcod nang pagharali kan l6 na miembros asin inapon sa Camp Crame an efecto napilay an campania sa pace orden na nagresulta kan sunod-sunod na manga criminalidad arog kan pinaka-huring incidente nin hold-up sa Jollibee fastfood chain.

        Kulang na ngani an miembros kan policia hahalian pa asin nangyari pang-sasabotaje sa pace orden kan Naga, sabi sa manga tuyaw kan oficiales local kan City Hall.

        An OIC RD nakatalaan kutang temporariong mag-oficina sa Naga PNP poon kan Martes, alagad biglang pinaapod kan Camp Crame kaya dai naka-abot huli kaini pigtutubodan na dagos nang mahahali na siya sa Bicol PNP.

        Mientras tanto, mayo pang nagluluwas na pangaran nin oficial kan PNP na iriribay ki Tira kun madadagos an paghaklas na sa saiya.

        An manga oficiales local kan City Hall sa pamamayo ni Robredo nagtutubod na kun mangyari na ngonian na semana an pagpalayas ki Tira posibleng efecto na ini kan open letter ki GMA asin peticion kan LMP asin kan gobernador kan Camarines Sur sa kahurotan na ribayan na an OIC RD.