An Sangguniang Panlalawigan kan Camarines Sur asin Sangguniang Panlungsod kan Ciudad nin Naga magkasuhay na nagpasar nin resolucion sa campania contra sa nabuhay na ilegal na sugal na jueteng, alagad mayong kamandag mala ngani mas naghiwas an lugar kan manga gugoan kan sugal.
Si Alcalde Jess M. Robredo kan Ciudad nin Naga nagpahayag na nagpasar na nin resolucion an City Hall na naghuhurot ki PNP Provincial Director P/Sr, Supt. Romeo Tambungui na ipapundo an operacion kan jueteng sa provincia na nakakalaog na sa ciudad an manga correador. Nagtutubod an jefe ejecutivo local na kun nagkusog lugod an ilegal na sugal na jueteng envez na mapundo, may proteccion sa manga halangkaw na oficial kan PNP asin politico.
Sa SP Camarines Sur an saindang resolucion iyo an suporta ki Tambungui sa mahiwas na campania sa sinambit na sugal, alagad perang aldaw matapos ipasar an resolucion sa suporta sa pagpuho kan sugal dai man naging efectivo mas naglakop na an jueteng mala ngani an pinakahuring gugoan sa barangay Camagong, Cabusao, Camarines Sur.
Ini apesar kan pahayag ni Tambungui na nagcrear siya ni task force na malapag kan mga lugar kan gugoan kan sugal mayo man nangyayari sagcod sana man sa manga pahayag sa prensa.
Pagsuag kan PNP provincial office sa duwang resolucion kan Naga asin Camarines Sur huli ta kun kasuarin pighuhurot kan mga oficiales local saka man dai naghiro sagcod na centralisado na an operacion kan sugal.
An manga lugar na gugoan kan jueteng iyo an Buhi, Bato, Nabua, sakop kan cuarto distrito; Goa asin San Jose, sakop kan tercer distrito, Canaman, Magarao, sakop kan segundo distrito asin Cabusao, Pasacao, Del Gallego asin Ragay kan premir distrito.
An jefe kan PNP Camarines Sur nagpangako pa ki Gobernador L-Ray Villafuerte na cocontrahon niya an ano man na pagbalik kan ilegal na sugal mayo man nangyari asin pigtutubodan na igwa pang mas halangkaw na oficial kan Bicol PNP an nagtataong proteccion nganing ipadagos na an nagadan na sugal sa provincia.
Mientras tanto, an League of Municipalities of the Philippines Camarines Sur chapter sa pamamayo ni alcalde Fernando Simbulan kan Nabua, enot na ambicion kan Liga na tugotan na magka-igwa digdi kan small town lottery nganing magka-igwa pa nin ingreso an mga LGU, sa ngonian an dai na nin girong kun sinda decidido sa STL mientras na nagbalik na an centralisadong operacion kan 1-37.
