ISUSUNAD na kan City Hall kan Ciudad nin Naga sa Committee on Public Safety sa Senado sa pamamayo ni Senador Gringo Honasan asin masangat nin manga caso administrativo asin criminal contra sa tulong manga oficial kan PNP na kinababalihan ninda Bicol PNP Chief P/Supt. Balligi Agnanayon Tira, Camarines Sur PNP Provincial Director Romeo Tambungui asin ki OIC COC P/Supt. Amor Macoy kan Naga PNP sa isyu kan ilegal na pag-pull out kan katorceng polis kan ciudad.

        Ini an dapat nang accion kan LGU Naga segun sa magkasuhay na manga pahayag ninda alcalde Jesse M. Robredo asin bise alcalde Gabriel H. Bordado Jr. An “aid of legislation” sa senado kaipuhan na mientras na igwa man nin kaparejong caso sa Bulacan asin Pampanga.

        Si Gobernador Ed Panlilio kan Pampanga, Gobernador Jojo Mendoza kan Bulacan asin Robredo kan Ciudad nin Naga nagkasundo na sarabay na nindang isunad an isyu sa comite ni Honasan nganing ma-ibitaran an posibleng pantutuyo na o kun dai man sabotaje na sa pagmantenir kan pace orden sa paghaklas nin mga polis na mayong coordinacion sa LGU.

        Napilay na an pagmantenir kan pace orden sa Ciudad nin Naga kan iimplementar na an pag-pull out kan 14ng polis sa directiva kan Camp Crame na pigtutubodan si Tira iyo man sana an nasa likod kaini. Kulang na ngani an polis, dai tubog si Robredo na igwang karibay na 12ng polis huli ta si dati ining dapat idugang sa numero kan Naga PNP envez an lakdang pagbawas sa personajes kan Naga PNP.

CONSEJAL TUASON NAGTULOD NA SANGATAN NIN CASO SINDA TIRA, TAMBUNGUI ASIN MACOY
        Si Consejal Jose Tuason, dating Chief of Police kan Naga PNP asin nagkapot nin halangkaw na puesto sa Bicol PNP antes naging miembro kan Sanggunian Panlungsod iyo an nagpadreno kan resolucion na dapat sangatan nin caso administrativo asin criminal sinda Tira, Tambungui asin Macoy.

        Kun cuestionable an directiva kan higher command iyan pueding ipaliwanag kan jefe kan PNP kun ta’no ta dai dapat iimplementar bakong papabuelohon dawa anong clasing orden susunodon, bako man kitang comunista na dapat sunodon an sugo kan dictador, sabi pa ni Tuason.

CITY LEGAL OFFICER NAGRECOMENDAR NIN LIMANG MGA CASO
        Sa pag-aadal kan City Legal Officer Atty. Angel Ojastro pig-recomendar na dapat sangatan kan manga minasunod na caso an tulong mga oficial kan PNP:

        1. Grave misconduct (administrative case)

        2. Violation of code of conduct and ethical standard for public oficial (RA 6713)

        3. Contempt of Court - in relation to the case for injunction pending before RTC 23

        4. Criminal case for anti-graft corrupt practices act.

        5. Violation of RA 9165 or comprehensive dangerous drug act of 2002.

        Sinabi ni Tuason na kabali pa an caso sa RA 9165 huli ta may miembro sa 14ng polis na envuelto sa pag-arestar sa drug pusher na pendiente ngonian sa jusgado, pigsasabi sa RA 9165 na dapat mayong superior officer na ibalyo sa ibang provincia o idestino an polis huli ta mahalagang marhay an pagtindog ninda sa corte bilang manga testigo. Sinda pig-contempt na kan corte huli sa pagpalyar na maka-aparesir sa vista kan caso.

DIRECTIVA KAN CAMP CRAME DAPAT SUNODON
        Si P/Supt. Eliezer Bron, parapahayag kan Bicol PNP asin OIC Chief of Police Amor Macoy kan Naga PNP, parejong nanindugan na an orden kan higher command dapat sunodon.

        Sinabi ni Macoy siisay man siyang oficial ta cocontrahon an directiva kan Camp Crame kaya nangyari na pig-pasunod an pag-relieved kan katorceng polis dawa kulang na an policia kan ciudad.