Kun turog an PNP Camarines Sur sa campania contra sa ilegal na sugal na jueteng an Capitolyo Provincial kan Camarines Sur asin City Hall kan Ciudad nin Naga igwa nang pigmuknang task force nganing mapuho an centralisado nang operacion kan sugal sa provincia na pigtutubodan protejido kan manga halangkaw na oficial kan PNP asin ibang politico.
Sa City Hall, an grupo kan Public Safety Office (PSO) sa pamamayo ni Joselito del Rosario naglansar tulos nin ofensiva sa manga correador asin apat na an saindang na-arestar sagcod na sinangatan nin caso sa pagbalga kan acta republica 9287 na mas halangkaw na an pig-iimponer na fiansa cantidad l8 mil pesos envez kan si dating penalidad na Php1,000. Kun maprovaran sa jusgado malalaom sa carcel nin 30 asta 90 dias mientras na 6 asta 8 taon na pagka priso sa personajes kan jueteng.
Si alcalde Jesse M. Robredo nagpaluwas nin directiva sa PSO huli ta mayong ginigibong accion an Naga PNP sa paglakop na kan manga correador sa laog kan 27ng barangay kan ciudad.
Afuera pa kaini, kan hagadon kan alcalde an tabang ni PD P/Sr. Supt. Romeo Tambungui na magcampania contra sa jueteng, alagad an simbag sa surat kan provincial director sa jefe ejecutivo local na mayong jueteng sa Naga asin Camarines Sur. Dai uyon an alcalde asin pigprovaran na may jueteng mala ngani apat an naarestar sagcod na nag-aatubang na nin caso sa corte.
Sa manga entrevista ki Tambungui an parating simbag kaini sa media na kun igwa man nin jueteng iyan guerilla sana asin bako ini an saindang prioridad envez an paglapag sa operacion kan ilegal na droga sa Camarines Sur.
Sa Capitolyo Provincial, si gobernador L-Ray Villafuerte nagpatanid na igwa na sindang pigmuknang Provincial Anti-Crime Task Force nganing iyo na an maglansar nin pananakyada sa gugoan kan jueteng sa apat na congressional district kan provincia mientras na mayong nagiginibo si Tambungui sa campania contra sa sinambit na sugal.
Pikong na si Villafuerte sa manga pagtuyaw kan media na sagcod na siya an gobernador dai na mabubuhay an operacion kan sugal digdi sa Camarines Sur, kabaliktaran naghiwas na lugod an sugal sa apat na distrito.
Igwa pang panahon an PNP ipapundo an sugal asin kun dai pakatapos kan barangay asin SK election an task force kan Capitolyo Provincial iyo na an malansar nin ofensiva, sabi kan kan gobernador
Tulong veces na an gugo kan sugal na jueteng sa provincia mayong marhay na acomplosimiento an PNP nganing magkadarakop an envuelto digdi nganing mapuho na an ilegal na actividad na ini.
