Quince por ciento kan elementos kan policia kan Naga City Police Station an mawawara oras na puersahon kan PNP Camp Crame na hugoton an katorceng polis apesar na mayo pa ngani nin coordinacion sa City Hall malinaw na pagtinak-tinak sa poder kan local na gobierno sa supervicion kan PNP sa laog kan jurisdiccion kan ciudad.
An City Hall mahanap nin lakdang nganing dai maglala an situacion huli ta ciertong mapipilay an pagmantenir kan pace orden na importanteng marhay sa sarong ciudad an katuninongan.
Ini an mga pahayag ni alcalde Jesse M. Robredo sa pag-atubang niya sa halipot na oras na press conference sa oficina kan jefe ejecutivo local sa paglinaw kan nagkaperang isyu local.
Masurat si Robredo ki PNP Chief Director General Avelino Razon nganing dai na hiroon an l4ng polis mientras na an motivo sana man kaini ni Bicol PNP OIC Regional Director P/Sr. Supt. Balligi Agnanayo Tira makabalos huli ta an manga afectadong polis sinangatan nin caso an jefe kan policia kan Bicol na pendiente sa RTC kaya ngani saro pa sa dahilan na dapat dai halion asin i-apon sa Camp Crame.
Nahahadit an jefe ejecutivo local ta tibaad idaklag sa Mindanao an sinambit na manga polis huli ta an nasa likod man sana kaini an Bicol PNP dai ini papaki-aram kan Camp Crame kun dai naghiro si Tira.
Disganado an manga polis kun pirit na iimplementar an directive huli ta mapaparayo sinda sa saindang familia, dapat sinda nag report na sa PNP Camp Crame kan Octubre l, 2007 alagad dai pa nagsunod huli ta piglalaom na matatabangan kan alcalde.
Sinabi ni Robredo namumundo siya kan arog kaining nangyayari sa policia huli ta ini suhay man sa saindang agencia alagad magibo siya nin gabos na remedyo nganing matabangan, an manga envueltong polis pig-aacusaran kan Bicol PNP sa ilegal na droga apesar na mayo man ginibong investigacion asin mayo man nin ina-atubang nin caso. Sinda pinapa-report sa Camp Crame asin duman soboot gigibohon an investigacion.
Mientras tanto, pigtutuyaw kan alcalde si PNP provincial director Romeo Tambungui sa abalang pagpadara nin limang mga pangaran nin oficial kan PNP bilang nominees na digdi na mapili nin fullfledged na chief of police asin risang pigtutuyo nganing dai makabugtak digdi nin bagong COP.
