RINIBONG organisacion sa Bicol an nagpa-registro sa Cooperative Development Authority (CDA) nganing maging cooperativa alagad 75 por ciento kaini bagsak an saindang operacion sagcod na dagos nang pigcancelar kan CDA huli ta bako naman efectivo an grupo.
Sagcod kan Septiembre 30, 2007 an record kan oficina rehiyonal kan CDA Bicol na may base sa Ciudad nin Naga nasa 997 na sana an activo asin padagos pa kan saindang operacion.
Sa entrevista ki Atty. Maria Lourdes N. Pesino-Pacaom OIC regional-director kan CDA Bicol sinabi kaini na sa saindang pag-evaluar asin pakikipag-olay sa mga lider kan cooperativa an mayor na causa kan dai pag-uswag huli kan kakulangan nin educacion.
Bako man na-ngangahulugan kulang sa formal education kun arog kaini an mortality rate envez manijamiento sa pagpadalagan kan sarong cooperativa.
An iba man na grupo nagsabi huli ta an tabang financial nganing ma-establiser an cooperativa hali sa politico daing pakimano sa pag-gamit kan fondo sagcod na igwa nang na-eenvuelto sa curapcion.
Dai man pueding ibasol sa CDA an pagbagsak kan operacion kan manga cooperativa mientras na an pag-uswag dai naka-asa sa sinambit na agencia, ini nasa cooperative sector, sabi pa ni Pacao.
An CDA na 17 anyos na iyo an regulatory agency na pueding mag-cancelar asin mag-desolved kan dai na activo asin nag-ooperar na cooperativa.
Naka-atang sa lideres an pagka-igwa nin padagos na educacion para sa dagdag kaaraman nganing maka-participar asin magsuporta an mga miembros.
Ngonian na bulan iyo an Cooperative Month Celebration asin kabali sa mayor na programa iyo an Cooperative Congress na gigibohon sa Octubre 25-26, 2007 sa Ciudad nin Legaspi afuera kan mga ginigibong forum sa manlaen-laen na provincia.
Piglalaoman na tutukaron sa congreso iyo an isyu sa mortality rate kan pagbagsak kan manga cooperativa.
Piglinaw kan OIC director na kadaklan kan 4,049 iyo si dating registrado kan manga nakaaging panahon na pig-confirmar na nasa susog sa Acta Republica 6930 o an Cooperative Code of the Philippines.
Kun igwang cooperativa na nanganga-ipo nin tabang nganing liwat makabangon igwang manga agencias local, nacional maging internacional na envuelto sa pagtabang sa sinambit na sector.
