Pili, Camarines Sur – An Commission on Election (COMELEC) nagpatanid sa manga candidate sa barangay asin Sangguniang Kabataan (SK) na segurohon na an pagpa drug test ninda ciertong sa acreditado kan Department of Health nganing dai iprotesta kan saindang kalaban an kapanganahan sa eleccion kun iyo an mang-gana sa resulta kan eleccion sa Octubre 29, 2007.
Dakul na manga drug testing center an nagbuburotwaan sa manlaen-laen na municipio kan Camarines Sur huli ta ini an madaling hanap buhay ngonian na eleccion mientras na an gabos na mga candidato sa barangay asin SK obligado na magpasa-irarum sa mandatory drug test susog sa seccion 36, Articulo 3 kan Acta Republica 9l65 o an Comprehensive Dangerous Drug Act of 2002.
Caption: DRUG TESTING CENTER - Pigpipilian na kan manga macandidato sa b’gay asin SK election huli ta ini pigmamando susog sa RA 9165 o an Comprehensive Dangerous Drug Act of 2002. Gabos na macandidato obligado na magpa-drug test. Sa retrato an drug test center kabali sa mga nakapalibot sa oficina kan LTO Naga na acreditado kan DOH.
Sa entrevista kan Bicol Mail ki Abogado Noriel Badiola, provincial election supervisor kan Comelec Camarines Sur sinabi kaini na tinutogot sana sa ley na dapat an manga candidato na mapa drug test sa acredidato sana kan DOH. Igwang listahan an Comelec kan manga drug testing center sa saindang web site gikan sa oficna kan DOH.
Nganing macierto na acreditado kan DOH kaipuhan helingon o hagadan kan mga papeles an drug testing center hali sa sinambit na agencia. Kun madiscobre kan saindang kalaban sa eleccion na mayo sa listahan an pueding cuestionon asin iprotesta an nang-gana sa eleccion huli ta sala si proceso si pig-agihan kan papeles kan ganang candidato, sabi pa ni Badiola.
An drug test certificate an kabali sa manga rekisitos kan macandidato sa eleccion sa Octubre 29, 2007 sa pagplantiar kan saindang certifico de candidatura (COC), alagad kun positivosa pag-gamit nin droga an local na oficina kan Comelec an mayo man nin poder na sinda idiscalificar envez an law department sa Manila.
Nagtutubod an provincial election supervisor na kun an sarong macandidato positivo sa droga dai na ini madagos kan saiyang ambicion sa eleccion huli ta iyo pa ini an pueding maging prueba na sangatan nin caso sa pagbalga kan Acta Republica 9l65.
An pagmando kan Comelec sa manga candidato na mag-agi sa mandatory drug test tanganing maseguro na igwang integridad sa pagkapot nin puesto sa barangay asin SK.
An pagplantiar nin COC nagsikad na kan Septiembre 29 asin ini matapos sa Octubre l8, 2007 mientras na an campaign period mapoon Octubre l9 asta 27.
