Pinapundo kan City Hall an pagpadagos kan patrabajo kan phase 4 kan construccion kan Metro Naga Coliseum sa central business district II tanganing idulag sa posibleng rapado nin makusog na bagyo na pueding maglaog sa Bicol ngonian na mga bulan kan Octubre, Noviembre asin Deciembre 2007.

        Katuyohan nganing dai na maulit si nangyari kan nakaaging duwang supertypoon Melinyo asin Reming na mientras na nagpapadagos an contruccion kan edificio nirapado kan makukusog na bagyo sagcod na dakula si destroso sa proyecto.

        An phase 4 kan proyecto may propuestong 53 milliones de pesos para sa bagong desinyo kan atop asin construccion.

        Sinabi ni alcalde Jesse M. Robredo na an patrabajo kaipuhan ponan na sa Enero 2008 na kun haen libre na sa ano man na calamidad asin dai nang kaulangan na maabala pa an construccion nganing magamit na sa Penafracia fiesta nurong taon.

        Afuera pa kaini, nakatalaan na bagohon an desinyo kan coliseum envez para sa dating l80 kilometros per hour sa kusog kan duros kan ano man na bagyo kaipuhan na an kapusogan sa pagsabat sa bagyo dawa may kusog na 240 kilometer per hour arog kan bagyong Reming, sabi pa ni Robredo.

        Mientras tanto, si City Engineer Chito Palmiano nagsabi na pigvisita na kan oficiales kan Association of Structural Engineer of the Philippines an Coliseum nganing adalan an paghaman nin bagong desinyo na dai na kayong bungkalon nin supertypoon. Sa masunod na semana mag-oorolay an City Hall asin an sinambit na asosacion nganing finalisaron an bagong desinyo na iyo an irerecomendar sa project designer kan edificio nganing iyo an iimplementar.

        Sa kaparejong entrevista ki Palmiano, sinabi kaini na si dipuntong congresista Rolando Andaya Sr. enot nagpabulos nin 40 milliones pesos para sa phase l asin 20 milliones pesos sa phase 2 mientras na sa phase 3 cantidad 10 milliones pesos sagcod sa phase 4 hali na sa gobierno local na pig-utang sa bangco.