Pakatapos nin sarong taon asin may walong bulan na mayong accion si Presidente Gloria Macapagal-Arroyo sa resolucion kan junta provincial kan Camarines Sur sa kahuroton na ribayan an pangaran kan Naga Airport na maging Pili Airport liwat naman na bubuhayon kan local na gobierno kan Pili, Camarines Sur an resolucion.
Si alcalde Alex San Luis kan banawaan nin Pili nagsabi na sainda giraray na na ipapadagos an kahagadan ki GMA na enot nang pigpunan kan nagtalikod na junta provincial asin ini suportado kan LGU kan nakaaging administracion ni dating alcalde Tomas Bongalonnta Jr.
Hahagadon ni San Luis an tabang ni congresista Luis Villafuerte kan segundo distrito kan Camarines Sur na harani ki GMA, dai man siya makadulok ki gobernador L-Ray Villafuerte huli ta magcontra partido sinda kan nakaaging eleccion local.
An resolucion kan junta provincial ina-provaran kan Pebrero l6, 2006 na pigpadrenohan ni vocal Angel Naval kan segundo distrito kan Camarines Sur asin inaprovaran ni gob. Villafuerte. Pighahagad ki Presidente Arroyo na mag-isyu nin executive order sa pagribay kan ngaran kan Naga Airport pasiring sa Pili Airport huli ta an sinambit na eropuerto yaon sa banwaan kan Pili na iyo an kabesira kan Camarines Sur.
An dating oficiales local kan Pili nagduda na dai pig-asecaso ni gob. L-Ray na ma-follow-up ki GMA an resolucion mientras na magcontra partido sinda kaidto ni Bongalonta mala ngani pigprovaran na ipasa-irarum sa preventive suspension mientras na may caso administrativo, alagad dai na-implementar kan ulangon kan jusgado.
Ngonian an paglaom kan LGU sa congresista kan segundo distrito huli ta magkakampi sinda sa partido kan KAMPI ni GMA asin alanganin sa gobernador ta dai ninda kaalyado huli ta nasa Lakas-CMD.
Dai naghiro an resolucion kan panahon ni Bongalonta mientras na yaon siya sa partido kan Aksyon Democratico ni dating senador Raul Roco.
Digdi na maheheling an kakayahan ki congresista LRV na harani ki GMA kun marerealisar an pagribayan nin pangaran kan sinambit na eropuerto.
An record kan Air Transportation Office nagpapaheling na an pag-ngaran kan Naga Airport sa kamawotan sana kan Philippine Airlines.
