KUN magpalyar pa an pag-take over kan Salcon Power Corporation (SPC) sa manijamiento kan Camarines Sur I Electric Cooperative (Casureco I) sa bulan nin Deciembre 2007 o kun dai sa Enero 2008 namemeligro na magsapo nin kadikloman an mga banwaan na sakop kan servicio kan cooperativa mientras na mapipiritan na magputol na nin corriente an National Power Corporation (Napocor) huli ta dai na nakakabayad kan P138 milliones na morosidad sa laog na nin duwang taon.
An SPC sa irarum kan investment management contract (IMC) iyo an nang-gana sa mga postador na maglaog sa contrata nganing iyo an magmanijar kan nalulugi nang Casureco I.
Si Board President Erwin Dilanco nagsabi na pighagad ninda sa SPC na magbayad na nin cash nganing mabayadan man kan manijamiento an morosidad na P138 milliones sa Napocor asin magkaka-igwa pa nin tres por cientong prompt payment discount.
Sa Septiembre 22, 2007 an manijamiento kan Casureco I asin an SPC magkaka-igwa nin miting nganing finalisaron na an contrata asin dapat sa Septiembre 20, 2007 iyo an pag-firma na sa contrata kan duwang partido Kun marealisar ini hahagadon kan manijamiento kan cooperativa sa SPC na magtao na nin partial na P138 milliones nganing ibayad sa morosidad sa Napocor.
Nalulugi an cooperativa nin P1.5 asta P2 milliones cada bulan may duwang taon, na kun nakakabayad man sa Napocor halangkaw na an P20 milliones ini para sana sa currect electric bill kan Napocor, alagad si utang an dai na kayang mabayadan, sabi pa ni Dilanco.
Sagcod na sana sa Septiembre 23, 2007 an validity of bids mientras na perang taon na na-abala dai nagiging efectivo an contrata kan SPC asin Casureco I huli kan pag-contra kan ibang grupo asin iba pang dahilan.
Naghagad na sinda nin restructuring para sa limang taon alagad binasura kan Napocor envez nagtugot sana sa tulong taon na dai man giraray kakayahon kan manijamiento. Huli kaini, dai mahahali na magpatanid an Napocor na putolan sinda nin servicio nin corriente.
Kan Julio 25, 2007 nagpaluwas nin notice of disconnection an Napocor na puputolan nin corriente sa aldaw na gayo kan kapiestahan sa banwaan nin Libmanan. Dai nadagos an pagputpot nin servicio nin corriente kan saindang hagadon ki Congresista Dato Arroyo na maki-aram muna nganing dai magsapo nin kadikloman, ini narealizar alagad dai nahahali ano man an bulan idagos na an pagputol nin corriente, sabi pa kan board president.
Sa presenting manijamiento ni OIC General Manager Josephus Motos nadidificilan nang makabangon sa crisis sa financial huli ta nag-aabot sana sa 94 por ciento an collection efficiency asin nagsakat na sa 24 por ciento an system loss.
14 por ciento an minimum na system loss na pigtutugot kan National Electrification Administration asin an sobrang 10 por ciento pigpapasa sa mga miembros consumedores.
Sa cada on por cientong system loss nalulugi an cooperativa nin sagcod sa P600,000 cada bulan.
Tangani sanang dai maputolan nin corriente nagkapera nang veces pig-sacrificio kan mga empleados an saindang remittance kuta na sa SSS asin Pag-Ibig pigdugang sa pambayad sa Napocor.
An saro sa solucion kan manijameinto nganing makahawas sa crisis sa financial iyo an pag-patong nin singil sa tarifa sa corriente, alagad an saindang peticion na dugang na 77 centavos cada kilowatt hour sa ERC an dai pa giraray ina-aprovaran apesar na kan taon pang 2004 tapos na an manga public hearing mayong accion an ERC.
