KUN na-aprovaran sa third and final reading sa Camara-Baja an pag-uktaba kan Barangay asin Sangguniang Kabataan (SK) sa ika-duwang Lunes kan Mayo 2009, posibleng mangyari na makalusot man an propuestong house bill sa pagtunaw kan Sanggunian Kabataan.
Si Congresista Felix “Nancing” Alfelor Jr. kan cuarto distrito kan Camarines Sur nagpahayag na igwa nang propuesto sa Camara-Baja na tunawon na an SK, mala ngani nasa 80 por ciento na sa manga representantes an nagpapabor sa propuestong house bill.
An SK sa ngonian segun ki Alfelor nagiging envuelto na sa maating tactica nin politica maging sa corruption mientras na sinda joven pa dapat mag-adal para sa saindang futuro dai maging enveulto sa ano man na karatan sa pagpadalagan nin gobierno.
Napeperwisio an saindang pag-adal na iyo an dapat tawan nin prioridad para sa saindang futuro. Kadakli kan activo sa SK dai na nakakatapos sayang kan saindang ambicion napapabayaan mas marhay pang tunawon na, sabi pa ni Alfelor.
Sa Senado si Senador Richard Gordon asin Aquilino Pimentel Jr. kabali sa nagtutulod na aprovaran na an bill sa pagtukaw na kan SK, alagad contra sinda sa pag-uktaba kan b’gay asin SK elections.
Alagad an SK federation sa Camarines Sur sa pamamayo ni Jovette Lucena, ex-officio member kan Sanggunian Panlalawigan nagpahayag na saindang kinokontra an sinambit na propuesto mientras na yaon sa local government code na an SK parte pa kan mga oficiales local.
Hinagad kan SK federation president na ano man na propuestong house bill sa pagsikwal na kan saindang sector kaipuhan paagihon sa general consultation sa gabos na mga jovenes.
Dai man siya uyon na mayong kaabtan an saindang organisacion huli ta mas activo ngani sa lado kan culture and arts asin sports na dai nang gayo natatawan nin atension kan mga oficiales local.
An dai siya uyon iyo an age limit sa pagiging miembros kan SK, alagad kun an congreso an magpanday nin ley nganing paraon na an saindang organisacion mayo sindang magiginibo, sabi pa kan pamayo kan SK sa Camarines Sur.
Magigirumduman an propuesto igwa nang enot na senate bill si Senador Gordon na nag-ani nin pagcontra sa mga jovenes sa ngonian liwat naman na bubuhayon an propuesto.
Kun pig-confirmar ni Alfelor na mayoria sa mga miembros kan Camara-Baja an pabor sa pagtunaw kan SK alagad sagcod sa ngonian an SK Camairnes Sur dai pa nakakarecibe kan copia kan propuestong house bill.
