Suficiente an supply nin bagas sa Camarines Sur mala ngani nagkaperang mga negociante hali sa Lucena asin Bulacan, nagdadayo pa digdi ngani sanang magbakal nin paroy.
An nangyayaring paghadit sa crisis sa bagas iyan artificial shortage sana, ini an report kan Consumers Protection Committee kan Sanggunian Panlungsod kan Ciudad nin Naga sa pamamayo ni Consejala Maria Elizabeth ‘Mabeth’ Lavadia asin kan Task Force kan NFA na pinangenotan ni Francis Hubilla kan sinda magconducir nin inspeccion sa mga traders asin bodega nin bagas sa laog kan ciudad kasuodmang hapon.
An bodega kan JY Brothers na bestadong dakulang negociante nin bagas sa Naga nagsabi na maluya ngani an bintahan ninda nin bagas sa Camarines Sur envez an dakul an demand iyo an provincias kan Albay asin Sorsogon.
Nagpapamahal kan precio kan bagas iyo an comprador ta si dating precio na Pll.00 cada kilo kan paroy nagsakat na sa P18.00, sabi sa reclamo kan mga negociante.
An ginigibo ninda nagbabakal nin bagas na mas barato an precio hali sa Iloilo asin Mindoro mientras na mahal an precio digdi sa Camarines Sur dawa na ngani bastante an bagas.
Nagpapadagos an aranihan nin paroy sa mga ngonian na saro sa pigbabasehan kan mga traders na mayong crisis nin bagas sa Camarines Sur huli ta nagluluwas pa ngani an supply nin bagas sa ibang provincia.
Sinabi sa Bicol Mail ni Lavadia na hinagad kan mga traders na ibawal lugod an pagpabakal nin paroy sa luwas kan provincia particularmente an ginigibong pag-angkat digdi kan hali pa sa Lucena asin Bulacan nganing maseguro na suficiente an supply nin bagas sa provincia. Ini saindang sugestion sagcod na kun puedi estrictohan magbugtak nin check point.
Nag-report man an NFA task force sa comite ni Lavadia na suficiente an supply nin NFA rice sa bodega kaini sa Pili, Camarines Sur.
Kun nagsasabi an NFA na suficiente an saindang bagas, alagad dai maipaliwanag nin toltol ta piglimitaran si alocacion sa mga NFA retailers, sabi pa kan consejala.
An sinambit na task force asin an consumers protection kan SP kan Naga nag-conducir nin inspeccion sa mga bodega nin bagas nin mga commercial rice nganing sinda mismo an mag-aram kan pigsasabing crisis sa bagas.
Nagtutubod pa an local na negociantes na pueding maglawig pa an halangkaw na precio kan bagas sa bulan nin Septiembre huli ta panahon pa ini nin aranihan.
