Pili, Camarines Sur –- Nag-andam na an gobierno provincial kan Camarines Sur nin P2 milliones na fondo nganing gamiton sa pambakal nin certified seeds asin ididistribuer sa mga paraoma na nangangaipo nin tabang para makatanum na tulos sa saindang mga oma matapos kan calamidad sa provincia.

        An problema kun sain na rehiyon makakakoa nin certiified seeds mientras na an oficina rehiyonal kan Department of Agriculture sa Bicol nadidificilan na makabakal sa ibang rehiyon nin awad-awad na supply nin banhi mala ngani igwa pa sana sindang natitipon na 500 na sakong banhi na kulang pa ngani sa sarong banwaan para mahipnoon an pangangaipo kan paraoma.

        Igwa nang ginigibong negosacion si DA Director Jose Dayao sa rehiyon dos sa supplier, alagad naglangkaw pa si precio envez si dating P800 pesos nag-abot na sa Pl,200 cada sako.

        Sinabi ni bise gobernador Salvio Fortuno na sa ginibong regular session kan junta provincial kan Martes sainda nang ina-provaran an appropriation ordinance na P2 milliones para gamiton na fondo sa pagbakal nin certified seeds.

        An fondo hali sa maabot sa P7 milliones na ingreso sa Camarines Sur Watersports Complex na hinagad ni Gobernador L-Ray Villafuerte sa junta provincial na mag-apropriar nin fondo para matabangan na an paraoma na naghahanap nin banhi.

        Dai naglalaom an gobierno provincial sa oficina rehiyonal kan DA sa tahaw kan agrangay na kan paraoma na dai nakaka-tarok nin paroy mientras na mayo sindang mabakalan nin banhi.

        An certified seeds na nadisponer kan DA na ipapabakal sa hababang precio kulang na marhay mala sa Milaor, Camarines Sur si alcalde Roger Flores naghahagad nin 500 na supply nin banhi an na-itao sana sa MAO office 80ng sako kaya dikit pa an nakaka-oma sa mga oras na ini.

        An report kan DA matapos kan nakaaging mga tubig baha maabot sa 500 milliones pesos si destroso sa kaomahan ini sa lado kan production loss.

        Ini ngonian an causa kan padagos na paglangkaw kan precio kan commercial rice dawa na ngani pigpahayag kan NFA na suficiente an supply nin bagas sa Camarines Sur.

        An pag-panic kan consumedores sa pagbakal kan NFA rice nangyayari na sa manlaen-laen na provincias kan kabikolan apesar kan mayong problema sa commercial rice an reclamo sana iyo na halangkaw an precio.