An rehiyon Bicol saro sa may halangkaw na produccion nin paroy sa 16 na rehiyon digdi sa Filipinas na nagka-ika anom na puesto na naka-ani nin 991,430ng metrico tonelada susog sa report ni Dr. Frisco M. Malabanan, Rice Program Director kan Ginintuang Masaganang Ani (GMA).

        An report minasakop kan taon 2007 na mas naglangkaw pa si produccion kun icocomparar kan taon 2006, kaya ngani an Department of Agriculture dai nagtutubod na nagkukulang an supply nin bagas sa kabikolan.

        Si Consejal Maria Elizabeth “Mabeth” Lavadia, nag-representar ki Alcalde Jess Robrero sa briefing kan International Rice Research Institute (IRRI) kan Abril 11, 2008 sa Manila dapit sa produccion kan paroy sa Filipinas asin sa iba pang nacion asin an posibleng paglangkaw pa kan precio sa mga maabot na panahon, nagsabi na mismo sa sinambit na tiripon an DA nag-confirmar na mayong shortage kan supply nin bagas sa nacion na an problema sana iyo na halagwaton an precio kan NFA rice asin commercial rice.

        Sa ginibong briefing ni Malabanan an Bicol may 286,374 na hectariang paroyan na pigtarukan kan 2007 asin an Camarines Sur nag-ika pito sa mga provincias kan nacion sa may halangkaw na produccion nin paroy.

        An nangenotan na may pinakalangkaw na produccion metrico tonelada nin paroy iyo an Central Luzon na may 2,942,113, nag-ika duwa an Cagayan Valley – 2,025,245, ika-tulo an Western Visayas – 1,992,426, nasa ika-apat an Ilocos – 1,642,301, nasa ika-lima an Soccsksargen – 1,186,688, ika-anom an Bicol-991,430, ika-pito an Eastern Visayas – 948,827. ika-walo an ARRM – 615,780, ika-siyam an Zamboanga Peninsula – 553,759 asin ika-sampulo an Northern Mindanao – 501,892 mientras si anom pang rehiyon nakaka-producir sana nin 39l,00 asta 450 mil.

        Sa kagabsan na produccion sa enterong Filipinas ini nag-abot sa 16,240,194 metrico tonelada ini sa 4,272,889 hectariang kaomahan.

        Sinabi pa kan IRRI nganing ma-mantenir na hababa an precio kan bagas kaipuhan masusteniran an halangkaw na produccion asin magbawas an production cost.

        Kabali sa mga dahilan sa ngonian na halangkaw an panga-ngaipo nin supply nin bagas huli kan padagos na paglangkaw kan populacion kan Filipinas na nag-aabot na sa 88,618,599 susog sa pinakahuring survey kan National Statistic Office kan 2007. Ngonian na taon piglalaoman na masakat an numero kan populacion sa 90,346,662.