An Bangko Sentral ng Pilipinas (BSP) sa Ciudad nin Naga nagtutubod na posibleng naglakop na sa Camarines Sur asin sa iba pang lugar an fekeng P200 bill matapos madakop kan PNP an sarong suspechado nagbabariwas kaini sa mercado publico kan Libmanan, Camarines Sur kan nagtalikod na semana mientras na nakadulag si tulo pang mga kaibahan.
Caption: MGA FEKENG CUARTA. Si Branch Manager Danny Calomag kan Bangko Sentral ng Pilipinas sa Ciudad nin Naga pigpaheling sa Bicol Mail an 37ng pidasong P200 counterfeit notes na nasamsam kan mga polis asin civilian sa sarong suspechado sa Libmanan Public Market.
Nasamsam sa suspechadong si Rolando Ilagan, 22 anyos, taga Daet, Camarines Norte an 37 pidasong P200 counterfeit notes mientras na nagsasaod ini, alagad si binakalan na tiendahan an nagduda na feke an darang cuarta na tulos pinaabot an reclamo sa Libmanan Municipal Police Station asin na-arestar sa tabang kan nagkaperang mga civilian, si tulong mga kaibahan an nagkadurulog na posibleng igwa pang darang counterfeit notes mala ngani nagkawaralat pa si iba sa tinampo.
An Libmanan PNP sa pamamayo ni Inspector Eddie Santiago sinangatan na nin caso sa corte an suspechado, nakaluwas man sana sa carcel kan makabayad nin fiansa.
Si Danny Calomag, branch manager kan BSP sa Ciudad nin Naga nagpatanid sa publico kan posibleng pagkuriyat kan fekeng cuarta na dapat ipaabot tulos sa saindang oficina. An P200 bill na counterfeit notes pig-confirmar na kan BSP Naga Branch na feke mala ngani parejas si mga serial number na BU245762.
Sa pagsiasat nagluluwas na bakong gibo sa printing machine envez sa computer na may inaapod na high resolution na printer, igwa nang computer machine kun ano si hitsura kan cuarta iyo an maluwas sa printer, sabi pa ni Calomag.
Maririsa tulos na counterfeit huli ta an papel mahibog, pagkinapotan pahuros mahalnas mientras na kun genuine currency pag-pinilsi igwang gudol-gudol sa walang canto kan P200 note, kabali pa nganing madeterminaran na feke an cuarta na kun an sarong bota nag-aadal sa pagpilsi kun pera an nakakapotan niyang papel na cuarta ma-aaraman huli ta makakapotan an marka kun pera an cantidad kaini.
Sa kaparejong entrevista kan Bicol Mail pigconfirmar pa kan BSP Naga Branch na nagkukulang an supply kan sensilyong 25 centavos huli ta pigtutunaw an coins na ginagamit an metal content kaini na ginigibong computer chip. An mga elementos kan NBI an nakadiscobre kan saindang sakyadahon an lugar kan pagtutunawan kan sensilyo sa Metro Manila.
An record kan main office kan BSP nagsabi na suficiente an supply kan 25 centavos na sensilyo, alagad huli kan ginibong ilegal na pagtunaw nagka-igwa nin problema sa supply.
Nakatalaan na mag-producir giraray nin milliones na sensilyo an lakdang kan BSP iyo na babaan an metal content, sabi pa kan branch manager. .
