Ma-apat nang bulan matapos i-upgrade an Naga PNP na maging Naga City Police Office (NCPO) susog sa General Order DTL-08-01 na aprovado kan Camp Crame na pagpasa-irarum sa direct administrative and operational control kan Bicol PNP, alagad an implementacion na dugang na mga facilidades asin miembros kan policia dai pa na-rerealisar sagcod sana sa papel.
Si OIC City Director P/Sr. Supt. Edwin Jose Nemenzo kan mag-asumir sa puesto dai pa ngani na sarong semana nakarecibe tulos nin 60ng miembros kan PNP hali sa Camp Simeon Ola kan Bicol PNP sa Ciudad nin Legaspi huli ta an Naga PNP kaipuhan na an dugang na elementos kan awtoridad mientras na ini saro nang district command, dai man nahehelingan na efectivo an general order na saro nang suhay sa PNP Camarines Sur.
Dai nahaloy binaklas man sana an bagong destinong miembros kan PNP hali sa Camp Semion Ola, sa dai maaraman na dahilan.
Sinabi ni Nemenzo na saiya nang pig-follow up sa oficina ni OIC Regional Director Roberto Bondoc an pighahagad na karagdagan na miembros kan policia na nagtuga ibabalik muna si 30ng polis, alagad dai man nangyayari asin dai maaraman kun nuarin maabot sa Naga.
Kaipuhan an dugang na 50ng service firearms, dugang na mobile car asin madugangan nin destinong polis an limang mga Sub-Station, dakul pang mga plano na sagcod sana sa drawing.
Naka-abot man an sombong sa Bicol Mail na rugado na ta sobra na sa doce oras an trabajo kan polis mientras na kaipuhan pa sinda sa mga police visibility na nangyayari ini huli kan pagkulang kulang nin elementos kan awtoridad.
Nakakatabang sa sobrang oras na trabajo iyo an mga police training na nag-papatrolia asin pagmantenir kan bulos nin trafico.
Si obligacion kan City Hall sa miembros kan policia para sa saindang bulanan na allowance an binalik na kan ribayan na si dating COP Amor Macoy na dai reconosido kan LGU bilang pamayo kan policia huli ta dai nag-agi sa tamang proceso an pag-designar sa saiya ni dating OIC RD Balligi Agnanayon Tira.
Sa pagkulang kulang nin mga miembros kan policia an City Hall nag-dugang man nin fuersa kan blue boys na nagmamantenir kan trafico kabali na an bagong organisaron na mga citizen patrol na nakaka-mata pa kan nangyayaring criminalidad sa centro kan ciudad.
