Si Msgr. Zosimo “Nono” Sañado, kuraparoko kan Parokia ni San Juan Evangelista kan Naga Metropolitan Cathedral nagconfirmar na kan saiyang plano na magcandidatong director kan Naga North District kan Camarines Sur II Electric Cooperative (Casureco II) Inc.sa pigtalaan na district election sa Agosto 30, 2008.

        Nagtugot na si Most. Rev. Leonardo Z. Legaspi O.P. D.D., Arzobispo kan Caceres, bilang kasimbagan sa manlaen-laen na organisacion na pighuhurot si Sañado na magcandidatong director kan cooperativa.

        “Kun kinakailagan na makakatulong tayo sa tao for service, ok ako, approved ako”, sabi sa osipon kan Msgr. sa media kun panong nagtugot sa saiya an Arzobispo kan Archidiocesis nin Caceres.

        An kuraparoko iyo an pinaka-enot na Msgr. kan Archidiocesis nin Caceres sa Ciudad nin Naga na malaog sa miinit na eleccion sa board of director kan Casureco II na dai naiibitaran pigpapa-kiaraman nin mga politico.

        Saiyang sinabi na Ok na magtabang an arin man na politico sa saiyang candidatura, alagad nagpatanid na habo siya na iindorsar bilang saindang oficial na candidato.

        Pig-osipon niya na surprisa siya sa mga informacion na magcandidatong director, ini nagpoon kan Junio 2008 kan dakul na mga text messages an padagos niyang narerecibi, na “pag-isipan mo daw ngonian kun magcandidatong director” an saiyang pagtubod na pigkakarawan siya kaya dai nagsisimbag.

        Kan enot na semana kan Julio 2008 narecibe niya an text messages na pig-forward ni Alcalde Jess Robredo na naglalaman na pag-isipan na niya an pagcandidato asin hinapon na siya kan alcalde kun ano an simbag, sagcod na pig-iisipan kan Msgr. kun seryoso o nagkakaraw an mga text messages. Nagtiwala na siya na seryoso an kahurotan na magcandidatong director kan mismo si grupo an nagpasiar sa saiyang oficina na habo nang sabihon an ngaran kan organisacion.

        Pigpahayag niya pa na kun arog kaini an consideracion kan grupo, “I can not answer you anything because an sabi ko an answer will defend ki Arzobispo ta padi ako”

        Pinalipas niya nin perang semana sagod na nag-abot an panahon nagka-olay sinda kan Arzobispo na an saiyang punto ta’no ta pinipili ninda ako, nag-iyo siya (Arzobispo).

        Kan nakaaging Sabado, nag-abot siya haling Manila sige naman an kulit sa cellphone.

        Kan Martes (Agosto 5) sinabihan niya an grupo na nagtutulod sa saiya na magcandidatong director “kun arog kaiyan an katuyohan ibinubugtak o an sakuyang puso, tinatao o an sakuyang sadiri ta paglingkod ini sa banwaan”

        Pigtawan na siya kan forma sa pagplantiar nin certifico de candidatura asin copia kan mga rekisitos sa pagcandidato.

        Hinagad niya na magka-igwa nin honesto asin malinig na eleccion huli ta mayo siyang makinaria, mayong centavo solamente an saiyang ambicion iyo an pag-opresir nin servicio.

        Sa kahapoton kun ano an pueding maginibo sa laog kan junta, segun saiya an “sala, sala, an tama, tama’ iyan an saiyang principio sa buhay.

        An huring pagplantiar nin certifico de candidatura pigtalaan kan Casureco II sa Agosto 20.

        An sinambit na distrito sobra na sa anom na bulan mayong representante matapos magdemiter sa puesto si Abogado Rene Raneses.

        Mientras tanto, nagluwas man na posibleng makalaban kan Msgr. sa eleccion iyo si Joel Cresini, Station Manager kan DWAR.


Si Msgr. Sañado nag-compisal sa entrevista kan Bicol Mail na bulan pa nin Junio 2008 padagos na nakakarecive siya nin mga text messages na pag-isipan na an pagcandidatong director sa Naga North District kan Casureco 2. Siya dating director kan Nabua Water District, Nabua, Cam. Sur.