An miembros kan Public Safety Office (PSO) kan City Hall kan Ciudad nin Naga masabay na sa miembros kan Naga PNP na mag sukbit nin armas sa oras kan saindang trabajo bako lang sa pagmantenir kan trafico envez maging sa paz y orden huli kan nakaka-alarma na an mga incidente nin criminalidad na nangyayari pa sa atubangan kan publico.

        Sa ginibong State of the City Address ni Alcalde Jess M. Robredo kan Martes sa Session Hall kan Sanggunian Panlungsod saiyang hinagad sa consejo na actuaran na an ordenanza na nagtutugot na magka-igwa na nin service na badil an miembros kan PSO nganing makatabang sa pagmantenir kan paz orden kasunod kan mga incidente nin criminalidad na an pinaka-huring caso iyo an paglikidar ki Market Supt. Francisco Ojeda.

        Si Bise Alcalde Gabriel H. Bordado Jr. presiding officer kan SP nagpahayag sa Bicol Mail na saiyang suportado an propuesto kan jefe ejecutivo local huli ta napapanahon na mientras na an parating dahilan kan Naga City Police Office kulang an saindang miembros nganing mamantenir an inaapod na police visibility.

        Alagad an kaipuhan si piling miembros kan PSO na dai maaboso sa saindang trabajo mientras na igwa nang sukbit nin armas, dapat mag-agi sinda sa training asin si diciplinadong miembros, sabi pa ni Bordado.

        Dai nang kaolangan an pagbakal nin mga armas huli ta igwa nang pigtagama nin fondo an local na gobierno.

        An jefe ejecutivo local disganado na sa liderato ni City Director P/Sr. Supt. Edwin Nemenzo kaya dapat mag-accion na an local na gobierno, dai siya contento sa mga pigsusumiter na accomplishment report kan Naga PNP na naghuros an crime rate sa ciudad, alagad darakula an mga caso.

        Sinabi kan alcalde “ sa presente dai siya contento sa liderato ni Nemenzo, sa heling ko po not enough para jusgaran na matibay o maluya in fairness saiya mas marhay an crime rate number this year as against last year pero mas dai trankilo an isip ngonian ki sa dati, duda ko dara yan nin duwang bagay, dara yan kan si dati saka ngonian”.

        An saro pang dai ngani nareresolveran iyo si nangyaring pag-hold-up sa mag-agom na contratistang sinda Edgar asin Rosario Roxas na kun haen 500 mil pesos si nalalay kan duwang hold-upper na lunad sa motorsiklo. Ini nangyari mga alas l2:45ng hapon sa Panganiban Drive sa atubangan pa kan dakul na tao.

        Mawot i-adaptar kan City Hall an Bantayan City sa Cebu na si mga miembros kan PSO igwa nang mga armas asin pig-attached bilang unit kan PNP asin dakulang bagay sa pagmantenir kan paz y orden.

        An mayoriang miembros kan SP nagpahayag nin suporta sa lakdang na ini afuera sana ki Consejal Jose Tuason na dapat adalan na marhay kun igwang problema legal an pagsukbit nin armas kan miembros kan PSO.

        Alagad sinabi pa kan bise alcalde na an gabos na proceso sa pagbakal nin armas asin pag-isyu nin badil sa piling miembros kan PSO ipapasunod mientras na kaipuhan na magkua sinda nin licencia sa badil sa Camp Crame.

        An PSO pig-crear susog sa Ordenanza Numerado 2005-056 na pinamamayohan ni Joselito del Rosario bilang executive officer. Nagkapera nang mga envuelto sa criminalidad an saindang na-arestar katuwang an Naga PNP.

        Sinabi pa kan bise alcalde na an gabos na lakdang kan PSO maging sa pag-arestar igwang coordinacion sa PNP huli ta ini an nakapalaman sa ordenanza.