Ciudad nin Quezon – Matapos nin apat na taon na magtago sa mata kan awtoridad nahulog na sa kamot kan NBI Manila an suspechado sa pag-gadan ki Gladys Toledano, 29 anyos, dating supervisor kan Mercury Drug Store sa Ciudad nin Naga.

        Ini an confirmacion sa Bicol Mail ni Abogado Ricardo ‘Ric” Diaz kan NBI central office sa paagi nin apod sa long distance kan Martes na banggui.

        An suspechado si Ceferino San Joaquin, dating kataid man sana kan residencia na arkilado kan victima sa barangay Sta. Cruz. Segun sa osipon ni Diaz na mismo an magurang kan victima an naghagad nin tabang sa NBI huli kan report na yaon sa Ciudad nin Quezon an acusado sa casong murder.

        Naarestar siya sa Balnak, Quezon City kan ma-noparan ni Diaz asin saiyang pag-iriba kan Martes na hapon sagcod na natutokan sa payo kan mag-provar pang magdulag sa mga awtoridad.

        An casong murder pendiente ngonian sa sala ni Juez Felimon Montenegro kan RTC sa Ciudad nin Naga asin suspechado nakatalaan na ipadara sa Naga nganing digdi laomon sa carcel mientras na pighahalat nalang an orden kan corte.

        Naging maka-ngerat an crimen huli ta pigparabogbog an babaeng victima na mayong kalaban-laban asin igwa pang tama nin matagas na bagay.

        Diez anyos na sa servicio sa sinambit na drug store an victima na nakatalaan na kutang ma-promote bilang manager.