Libmanan, Camarines Sur – Binasura sana kan National Electrification Administration (NEA) an ina-provaran na resolucion kan junta directiva asin sa general assembly kan Camarines Sur I Electrict Cooperative (Casureco I) Inc. na naghahagad na palawigon pa nin 100 dias an trabajo kan NEA management team sa pagpadalagan kan cooperativa na nag-iimplementar nin mga reforma nganing makahawas sa pagkalugi perang taon na an nakaka-agi.

         Sagcod na sanang 30 dias an NEA management team na pinamamayohan ni Engr. Charito Mabitasan, bilang project supervisor asin acting general manager matapos kan 100 dias na pigtaong termino sa sainda nganing iyo an temporariong magpadalagan kan nalulugi nang cooperativa nin corriente.

        Si Director Erwin Dilanco kan distrito kan Libmanan na pigconfirmar sa sainda ni Deputy Administrator Pablo Pan na dai inaprovaran an board resolution sa dahilan na an tulong mga oficial kan management team may trabajo sa central office asin mga taga Manila asin yaon digdi nag-eerok an saindang mga familia.

        Piglanatan kan junta an NEA management team huli kan nagka-igwa nin mga reforma sa laog kan manijamiento mala ngani inaabot na sa 99 por ciento an collection efficiency asin nasa l8 por ciento na sana an systems loss.

        Segun sa deputy administrator na kun gusto kan junta halaton na sana an 90 dias antes mag-decicion kun dapat pang e-extendir giraray nin 100 dias.

        An grupo kan personajes kan NEA nag-iimplementar kan estrictong pag-colecta kan electric bill asin mapahuros an systems loss asin igwa pang mga nadidiscobreng mga anomalia sa ibang empleados arog kan dai pigreremisong collection sa ibang mga sub-office.

        Kun nag-susuporta an junta sa NEA management team, alagad an ibang mga department head nagsombong na mas nagagastosan logod an Casureco I huli ta si Mabitasan nagrerecibe pang 24 mil pesos na honorarium cada bulan mientras na tig-20 mil pesos sa duwa pa kaining mga staff.

        Sinda igwa nang dating halangkaw na nacocobrang sueldo sa NEA central office, dai pa contento naghahagad pa nin honorarium sa bangkaruti nang cooperativa.

        Piglinaw ni Dilanco na ini awtorisado kan NEA mientras na an pigbabayad na sana mga honorarium.

        Nagastos nin 82 mil pesos cada bulan an cooperativa kabali na an saindang pagkakan.

        Dai ngani nakakabayad kan morosidad sa National Power Corporation, pighuhothutan pa giraray nin fondo an tios na cooperativa nin corriente, sabi sa tuyaw kan sarong empleado na habo nang magpasambit kan saiyang pangaran.