Binadil gadan kan duwang suspechado lunad sa motorsiklo an market superintindent kan Ciudad nin Naga, agang amay kan Martes sa atubangan kan residencia ni Congresista Luis Villafuerte sa Barangay Balatas.

        Si Francisco “Paco” Ojeda, 63, duwang taon na sana antes magretiro sa servicio sa gobierno, nagsapo nin sarong bala nin caibre .45 sa saiyang payo asin tulos binawian nin buhay kan matumba sa Balatas road.

        Si alcalde Jess M. Robredo nagpaluwas na nin P100,000 na reward money sa makakatokdo asin makaka-arestar kan suspechado. An reward money itatao kan alcalde oras na maisangat an caso sa corte.

        Nagluwas an report gikan sa mga testigos na antes badilon si Ojeda nagka-olay pa sinda kan gunmen.

        An duwang suspechado lunad sa color itom na lomang motorsilo na mayong placa mientras na si suno sa likodan iyo an nagpaputok kan badil dai ngani ma-sarong metros an distancia segun sa mga testigos. Tulos nagpa-abante padulag an suspechado haling Magsaysay Avenue pasiring sa Penafrancia Avenue asin dai na inabutan kan mga awtoridad huli kan 25 minutos matapos kan crimen saka nagresponde an mga polis na hali sa Police Community Precinct (PCR) No. 2 sa Bgry. Penafrancia.

        Na-enot pang maka-abot sa lugar kan incidente si Robredo asin Joselito del Rosario, jefe kan Public Safety Office kan City Hall.

        Binadil an victima mga alas 6:00 nin aga hali sa saiyang regular na pag-jogging sa compound kan Penafrancia Basilica Minore.

        Si P/Sr. Inspector Willy Lazala, jefe kan PCR nagpahayag na nagpapadagos pa an saindang investigacion mientras na igwa nang testigos nganing makatabang na mabisto asin maarestar an gunmen

        Sinabi ni Frediric Arias, assistant markert supt. kan Naga City Public Market, na nagkaperang mga ocupantes kan mercado an nakadismintihan ni Ojeda.huli sa estrictong pag-implementar kan ordenanza kan local na gobierno sa operacion kan mercado.

        Afuera pa kaini, an pinakahuring osipon kan victima iyo an sarong text message na nagpapahayag na”maconsencia ka-man pag may mangyari sako ika an enot kun kakalagon’

        An awtoridad kabali sa angulo nindang pig-iinvestigaran iyo posibleng may relacion sa saiyang trabajo an incidente mientras na sa statement kan saiyang esposa na si Arlene, sinabi kaini na mayo man siyang aram na magabat na kaiwal personal na maging dahilan nganing likidaron an saiyang esposo.

        Si Robredo nagsugo na ki City Director Edwin Nemenzo na hidalion an investigacion kan caso huli ta nagkapera nang mga caso criminal sa Naga an sagcod sa ngonian dai pa giraray nareresolveran.