Hinagad kan Muslim community sa Ciudad nin Naga sa gobierno nacional na magka-igwa muna nin ceasefire asin ipadagos an peace negotiation sa Moro Islamic Liberation Front huli ta ini an solucion nganing mapundo an pagbulos nin dugo sa rehiyon kan Mindanao na nakakabali pa an inocenteng mga civilian maging kapwa Muslim.
Namumundo an grupo sa Ciudad nin Naga ta pati na mga kaagian nakakabali sagcod na afectado an pagbuhay sa mga lugar kan barakbakan kan tropa kan gobierno asin rebelde sagcod na inapod nang terorista an MILF.
Si Haron Geroy, bise presidente kan Bicol Islamic Education Foundation, (BIEF) Inc. nagpahayag sa Bicol Mail na dapat palipoton muna an mainit na guiera asin magka-igwa nin ceasefire.
Sa pinaka-huring report 33 na an mga nagkagarada kadakli mga inocenteng civilian asin soldados kan gobierno, kun ibabasura an ceasefire posibleng maglangkaw pa an numero kan mga victima sa nangyayaring crisis sa paz y orden, sabi pa kan lider kan Muslim.
Nagkaperang mga Senador an nagtutulod na suspendiron an orolay pang katuninongan huli kan ginibong pang-aataki kan MILF sagcod na an inapod na sa terorista na an saindang ginigibo mientras na pati na an mga kaharongan nin dakul na mga familia na mayong pagkaaraman sa kariribokan an pigsusorolo.
Nagtutubod si Geroy na naging ugat naman kan kariribokan sa Mindanao huli kan nagpalyar na Memorandum of Agreement on Ancestral Domain (MOAAD) na nakatalaan fermahan kuta kan gobierno asin kan MILF, na nagtutugot sa mga rebelde na magpadalagan kan gobierno sa pinahiwas na autonomous region sa Mindanao.
Pigbabasol kan lider kan Muslim sa Ciudad nin Naga an administracion ni Presidente Gloria Macapagal-Arroyo huli kan kawaran nin consultacion kan lakdang sa MOAAD.
Kun nangyari ini pueding mabanga an Mindanao sagcod na maging arog kan caso sa Sabah, segun pa sa lider kan Muslim.
Sa mga nangyayaring garadanan na envuelto an MILF na nakabali pa an incodenteng civilian, pigpahayag pa ni Geroy, ini bawal sa Islam, “bawal mag-gadan kan mga inocente na mayo man nin na-aaraman sa kariribokan dapat maging mahinahon, aramon mo muna an dapat”
Dai ka pueding apodon na sarong Muslim kun dai ka man nag-gigibo nin karahayan lalo na an pagsamba ini obligacion, an pag-penetencia, an pagtao nin charity, kaya imposileng magibo nin kararatan para raoton an imagen kan muslim, kaya an saindang dios iyo na an bahala magjusgar sa saindang ginibong kararatan, sabi ni Geroy.
