Nagpatanid an mga militang grupo sa Camarines Sur na igwa pang mga masunod na gigibohon na noise barrage kasabay kan mga hiro protesta sa Metro Manila nganing contrahon an mga lakdang ngonian ni Presidente Gloria Macapgal Arroyo na buhayon an planong charter change.
Kan nakaaging Sabado (Agosto 15) pinangenotan kan Bayan Muna Camarines Sur an ginibong noise barrage sa Plaza Quince Martires kan Ciudad nin Naga asin ini kasabay man sa Metro Manila asin sa iba pang rehiyon.
Si Jariz Beda, lider kan Bayan Muna sa Camarines Sur nagsabi na an saindang pang-riribok nganing ipaheling ninda an pusog na pagcontra mientras na ini suportado kan manlaen-laen na sectores.
Nagtutubod sinda na an intencion ni Presidente Arroyo na maretoki an constitucion nganing mapalawig pa siya sa puesto sa Malacanang.
Nagpatanid an grupo na magpapadagos an saindang mga hiro protesta nganing dai marealisar an plano ni GMA na magkurapot sa Malacanang.
Ipinahayag pa na dawa anong formaa de gobierno an mawot mangyari ni GMA kun mahiwas an curapcion sa saiyang administracion mas lalong magtitios an Filipino mala ngani an satong nacion an survey nagsasabi na an Filipinas saro sa may halangkaw na casong curapcion sa ASIA.
An pangiturogan ni GMA na magka-igwa na kitang federalismo, alagad mismo ngani an simbahan an nagcocontra huli ta kun igwang nangyayaring crisis sa paz y orden sa Mindanao sa nagkaperang sector dapat dai na enterohon na ibali man an iba pang rehiyon
An Catholic Bishop Conference of the Philippines asin an El Shaddai na pinamamayohan ni Mike Velarde, parejas an saindang panindugan na ulangon an cha-cha, alagad nafavor sana sinda pakatapos na kan eleccion sa 2010 asin paagihon sa Constitutional Convention (Concon).
Nagpatanid an simbahan na sinda matomar accion kun papalawigon pa an termino ni GMA sa paagi kan pigtutolod na federalismo..
Mientras tanto, si Senador Mar Roxas na nagvisita sa Ciudad nin Naga nagpahayag na contra siya sa cha-cha mientras na duwang taon na sana pigtalaan na an eleccion presidential.
Mapabor an senador sa cha-cha kun ini papaagihon sa Constitutional Convention huli ta an mga delegado igwang mandato sa electorado envez kan ano man na pagka-igwa nin constituent assembly na planong palawigon kan congreso an saindang termino.
