Pili, Camarines Sur – Mga professional na dayuhan na hold-upper an pigtutubodan kan Municipal Police Station sa banwaan na ini an suspechado na nagsalakat sa Cosay Rice Mill sa barangay San Roque na nangyari alas 10:55 nin aga kan Agosto 16.
Sinabi ni P/Supt. Froilan Navarosa, jefe de policia Pili Police Station sa investigacion kan policia maabot sa 200 mil pesos asin sarong cellphone an nabitbit kan mga hold-upper sa laog sana nin perang minutos kan laogon an cashier office, alagad antes makalaog enot na sinuntok an security guard na si Rogelio Ramisares Jr. asin pigdis-armarar pa kan calibre 38ng service firearm.
Natulala an guardia, mayong naginibo mientras natutotokan nin halipot na badil kan saro sa tulong mga hold-upper. Dai nagtago kan lalawgon mala ngani dai nag-gamit nin maskara an mga suspechado na pigtutubodan calibre 45 an darang mga armas.
Lunad sa pulang motorsiklo na dai nakoa si plate number asin an direccion kan mga suspechado pasiring sa Bula, Camarines Sur o kun dai man sa Ciudad nin Iriga.
Sagcod pa sana sa cartographic skates dai pa mabisto an responsable sa amay na pananalakat sa negociante.
An jepatura kan banwaan na ini nasurprisa kan incidente mientras haloy nang mayong nangyayaring agang robbery hold-up na dai aro-alangan an grupo dawa mayong tahub an saindang lalawgon kaya an investigador nagtutubod na dayuhan an mga suspechado.
Huli ta nagkapera nang mga caso na gamit an motorsiklo sa mga criminalidad kabali na an snatching asin panlilikidar si Provincial Director P/Sr. Supt. Rodolfo Llorca nagsugo sa mga miembros kan PNP sa Camarines Sur na maglansar nin mga check point sa pag-inspeccion kan mga nagpapadalagan nin motorsiklo sa highway.
Pigponan na kan Martes sa Milaor, Camarines Sur na kun haen dakul an mga nagkadarakop na dai registrado asin nagmamanijo na mayong licencia.
dDakul nang mga incidente nin snatching asin robbery hold-up ginagamit kan mga suspechado sa Ciudad nin Naga, an motorsiklo na mayong placa asin an pinakahuring caso iyo an paglikidar ki Market Supt. Francisco Ojeda asin pag-hold-up sa tahaw kan tinampo kan mag-agom na contratistang Edgar asin Rosario Roxas, cantidad 500 mil pesos an nabitbit kan duwang hold-upper na sagcod sa ngonian lista pa sa dahon an investigacion kan Naga City Police Office.
