Igwa nang vehiculos an Naga City Police Office (NCPO) asin Public Safety Office (PSO) nganing gamiton na panlapag sa mga snatcher asin iba pang nangyayaring criminalidad sa Ciudad nin Naga na gamit an motorsiklo.
Si Bise Alcalde Gabriel H. Bordado Jr. nagsabi na ina-provaran sa session regular kan Sanggunian Panlungsod kan Martes an ordenanza sa pagpaluwas nin P800,000 nganing ibakal nin mga motorsiklo, VHF radio asin kabali na si alocacion sa gasolina.
An P400,000 para sa limang motorsiklo, P300,000 sa VHF radio asin an P100,000 alocacion sa gasolina.
Ini na an panlapag kan mga awtoridad sa mga naghahasok nin criminalidad sa laog kan ciudad huli ta nagkapera nang mga incidente nin robbery hold-up asin pambabadil na an mga suspechado gamit an motorsiklo, sabi pa kan bise alcalde.
An miembro kan PSO iyo an mamanijo kan motorsiklo asin maysukbit nin VHF radio mientras na an nakasuno iyo an miembro kan Naga PNP na dapat magbitbit nin halabang armas.
Magagamit ini sa marikas na pag-responde huli ta dawa sa mga suksok na lugar pueding makalaog an motorsiklo.
Dinagdag pa ni Bordado na sa masunod na miting kan Naga City Peace and Order Council saindang tutukaron an planong pagbakal nin mga armas para sa miembros kan PSO nganing parejo nang may-armas an magka-tandem na PSO asin polis sa motorsiklo.
Kun ma-realisar an plano kan City Hall i-attached na an PSO sa Naga PNP nganing mayong cuestion sa pagdara nin armas sa panahon kan saindang trabajo.
Sinabi pa kan bise alcalde na an PSO na masukbit nin armas dapat mag-agi sa mga training nganing matukdoan sinda kan tamang disciplina sa pagdara nin armas. Mayoria kan miembros kan consejo local pabor na armasan na an miembros kan PSO.
An PSO dakulang tabang na sa Naga PNP huli ta igwa na sindang mga nagkakadarakop na mga snatcher bako sanang nag-mamantenir kan trafico sa central business district.
Si City Director Edwin Nemenzo an parating dahilan sa pagmantenir kan paz y orden kan Naga PNP iyo an kakulangan kan miembros kan policia.
