Balik sa dating duwang jefe de policia an Municipal Police Station kan Libmanan, Camarines Sur huli kan paki-aram ni Bicol PNP Chief Paterno Bangui sa directiva ni Camarines Sur PNP Provincial Director P/Sr. Supt. Rodolfo Llorca sa pag-relieved ki P/Chief Inspector Eddie Santiago bilang COP, pigribayan ni P/Sr. Inspector Danilo Quidit mientras na igwang poder an provincial director sa pagbalasa nin mga Chief of Police.

        Pinatukawan na kan nakaaging Lunes ni Llorca si Quidit bilang OIC COP kan Libmanan PNP mientras na igwa man napupugolan na memorandum, alagad sinabi ni Santiago sa media na igwa man nin directiva si Bangui na dai abandonaran an puesto.

         An sabi pa ni Quidit, dai siya mahali ta igwa siyang napupugolan na directiva gikan sa provincial director asin igwa man puting kabayo si Santiago hali sa Bicol PNP asin saiya pang pig-oorgullo na habo siyang pahalion ni diputado Dato Arroyo kan premir distrito.

        An kaparejong incidente nangyayari pa sa ibang banwaan kan Camarines Sur.

        Kan maka-olay kan Bicol Mail si Alcalde Rodolfo Jimenez Sr., sinabi kaini na kan maka-olay niya sa telepono si RD Bangui, segun sa pamayo kan Bicol PNP na si Santiago pig-sugo na dai maghali sa Police Station kan Libmanan.

        Kaya ngani an presenting nagtutukaw na COP nakapulot sa puesto huli kan orden ki Llorca na bawion an relieved order, alagad dai paman pigsusunod envez an instruccion ki Quidit dai maghali sa oficina.

        Si Santiago hinali sa estricto nang pag-implementar kan PNP CSur sa one strike policy, na nagkapera nang veces naconfirmar an operacion kan jueteng matapos may maarestar na mga correador.

        Kan hapoton an alcalde an saiyang reconosidong jefe de policia iyo si Santiago sa pagtubod niya na marhay an performance asin an ano man na accion kan provincial director mayong coordinacion sa saiyang oficina. Dai nakarecibe nin ano man na surat sa pag-relieved asin pagpatukaw sa bagong COP an oficina kan alcalde.

        Sinabi pa kan jefe ejecutivo local dapat kuta na an ginibo kan provincial director kun gustong ribayan an presenting COP nagsumiter nin mga listahan kan nominees na oficial kan policia nganing magpili nin full fledged na jefe kan PNP, kaya sagcod sa ngonian si Santiago iyo an saiyang reconosido maging kan Sanggunian Bayan.

        Magigirumduman kan ika-duwang semana kan bulan nin Julio 2008 an kaparejong problema nangyari, naresolveran sana kan magsugo an Bicol PNP na bawion an relieved order.

        Huli ta dapat yaon na sa provincial director an pagbalasa nin COP, pinabalik ni Llorca si Quidit sa sinambit na Police Station.

        An motivo kan PNP Camarines Sur na balasahon an ibang mga COP huli kan dai nag-cocooperar sa campania laban sa ilegal na sugal na jueteng.

         Mismo si Gobernador L-Ray Villafuerte an may directiva sa pagpuho kan sinambit na controvercial na sugal.

         An area of responsibility kan nagtutuyaw na COP kan Libmanan nagpapadagos an operacion kan jueteng asin an bola ginigibo tulong veces sa cada aldaw sa barangay Handong.