Tigsik ko an mga maestrang angot
Nin huli sa trabahong udok sa boot
Nalingawan na an ngaran nin pagkamoot
Kaya sa langit, masakit nang makaabot.


Tigsik ko an mga taga-medya
Peligroso talaga an buhay ninda
Orog kun maisog na komentarista
Siguradong papakakanon nin bala.


Tigsik ko kun may mga paglinog
Gabos na bagay minabuyug-buyog
Apuera sana kan sarong klaseng pagyugyog
Na an resulta, tulak nin babae minabutog.


Tigsik ko an mga tsuper na maiigot
Rogado pirme sa maghapon na pagkayog
Nagsasaralak na an panos asin ganot
Kaya dapat pirmeng magkarigos, magpahamot.


Tigsik ko ngonian ining mga maestra
Bawal daa magkapot, kwarta kan mga eskuela
Alagad “okey” lang kun superbisor an minakua
Dai lamang supog maggastos kan bako niya.


Tigsik ko man ining mga pasahe
Na nabibiktima nin mga empleado
Nin bus na mga arogante, abusado
May nanghahapros, may daing modo.