Mga pagkantiaw sana an comentario ni DBM Secretary Rolando Andaya Jr. sa Bicolanong star witness na si Rodolfo Lozada Jr. sa controvercia sa ZTE deal mientras na si Gobernador Joey Salceda kan Albay nagsabi na an pag-atubang ni Lozada sa Senate inquiry nagpapaheling sana na buhay an democracia sa Filipinas.

        Sinda Andaya asin Salceda naconduciran nin magkasuhay na entrevista kan prensa sa Ciudad nin Naga kan sinda naging presente sa general assembly kan League of Provinces of the Philippines na ginigbo sa Villa del Rey sa Capitolio Provincial sa Pili, Camarines Sur.

        Sinabi ni Andaya “Jesus ni ciencong doleng mayo pang envueltong cuarta sa NBN deal kaya hain an pigsasabing billiones pesos na kickback”.

        Mayo pang na-iluluwas na cuarta an China, mayo pang narerecibi an national treasury so anong pigsasabing kickback, sabi pa kan DBM Secretary.

        An duwang mga Bicolanong oficial parejong harani ki Presidente Gloria Macapagal-Arroyo, mientras na si Salceda dai nagparesa nin pagka-pikon si mga reaccion sa pag-atubang kan star witness sa senado alagad si Andaya nagkantiaw na sarong tila novela sa TV an mga pahayag kan testigo.

        An simbahan nagtutubod sa testimonia ni Lozada kaya ngani an Catholic Bishop Conference of the Philippines na-ngapodan sa gobierno na dapat magkasararo para sa katutuanan.

        Igwa nang grupo sa simbahan sa Albay an nagpahayag nin suporta sa star witness sagcod na sainda nang pigpapa-mimi si Lozada na mayo man lugod mangyari sa saiya sa pagluwas nin katutuanan.

        Si Lozada asin Senador Antonio Trillanes, parejong taga Ciudad nin Ligao kan provincia nin Albay.

        An tugang niya na si Samson, sarong chofer nin trimobile, nag-eerok sa Ciudad nin Ligao nagsabi na nasa publico na an pag-jusgar sa mga binutasan na testimonia kan saiyang tugang na si Jun.