Nakatalaan na marealisar man giraray na maibalik an ibang oficina rehiyonal kan gobierno sa Ciudad nin Naga gikan sa Ciudad nin Legaspi na nagcierto nang mabalyo iyo an Land Transportation Office (LTO), pighahalat nalang an pagpasar nin resolucion kan Sanggunian Panlungsod sa donacion kan tres hectariang lote na icoconstruir an oficina sa duwang escalong na edificio.
Tugot na an oficina central kun igwa man sanang seguradong lote na papatindogan kan bagong edificio para sa oficina rehiyonal asin ibabalyo nang dagos an LTO district office kan Naga na kataid kan NBI regional office ngani sa saro na sanang edificio, ini an mga pahayag sa Bicol Mail ni Director Ramon S. Roco.
An pangakong idodonar na lote kan City Hall namumugtak sa kataid na oficina kan Traffic Management Group sa Concepcion Grande, alagad sa entrevista ki Consejal Nelson Legasion an propriedad nasa ngaran na kan National Housing Authority na kun haen makikipag-negociar an ciudad nganing itao sa LTO an tres hectaring lote.
Kun dai ma-aprobar kan NHA, an pueding idonar iyo an dos hectariang lote sa Almeda Highway na pig-donar naman sa City Hall.
Sinabi pa ni Legasion na an Sanggunian Panlungsod nagpasar na nin resolucion na nagsusuporta sa planong pagbalik na kan LTO regional office sa Ciudad nin Naga.
An mayor na dahilan kan decicion kan paghubo kan oficina huli kan dakulang destroso kan pagbulos nin lahar hali sa volcan mayon kan maglamasa si super typoon Reming kan Nobiembre 2006.
Sinabi ni Roco na habo na ninda mangyari na cada calamidad pig-aagihan nin tubig baha an oficina rehiyonal na dakulang perwisio sa mga may transaccion sa sinambit na agencia.
Sa sinambit na calamidad inabot nin anom na bulan naparalisar an saindang oficina asin pigkakarkulo nin maabot sa 40 milliones pesos si danyos kabali na si mga computer unit asin si edificio.
Napag-araman na an mga empleados kan oficina an nagcocontra huli ta mapaparayo sinda sa saindang familia, maging an ibang mga politico dai maiibitaran na macontra kan planong ini, sabi pa kan LTO Director.
Kan panahon ngani na idakit an oficina rehiyonal hali sa Naga pasiring sa Legaspi, si mga empleados man kaidto nagrereclamo, alagad dai nahaloy natuod na sana sa bagong lugar kan oficina.
Afuera pa kan LTO igwa pang ibang agencias an naghihiro na makabalyo sinda sa Naga o sa laog kan Camarines Sur.
Kadakli kan mga oficina rehiyonal kan manlaen-laen na agencias de gobierno namumugtak sa Naga, alagad nabutong pasiring sa Albay huli kan paki-araman nin sarong politico na hali sa sinambit na provincia sagcod na inapod an Legaspi City na Regional Center nganing iyo an pasikadan na pig-aprobar kaidto ni dipuntong dictador Marcos.
