Ciudad nin Legaspi -– Kun magpapadagos an operacion kan small town lottery (STL) asin ilegal na sugal na jueteng sa Albay, dakulang efecto sa economia huli ta 300 asta sa 500 milliones pesos cada taon an hinahakot na cuarta paluwas sa ibang provincia huli ta an operator kan legal asin ilegal na sugal mga dayuhan.
Magkukulang an circulacion kan cuarta sa Albay huli kan milliones pesos an pigluluwas digdi mientras na an operator ngani kan STL taga Manila asin an jueteng hali pa sa Batangas.
Si bise gobernador Brando Sael nagpahayag kan obserbacion na ini huli kan lakop na tarayaan sa sinambit na mga sugal alagad an coleccion o ingreso kan mga operator hinahakot an cuarta sa saindang provincia na dapat mag-circular sa saindang provincia envez yaon na sa ibang lugar
Sa ngonian binawi muna kan Sanggunian Panlalawigan an permit sa operacion kan STL huli kan mga iregularidades na nag-bubola aro-aldaw, alagad dai na-momonitor kan gobierno provincial an naglalaog na coleccion.
An Pilipinas Pacific Rim Corporation iyo an pigtawan nin franqucia kan Philippine Charity Sweeptakes Office alagad naging cuestionable na an saindang operacion kaya dapat sanang bawion an permit, sabi pa ni Sael.
Ginagamit sanang front kan jueteng an STL kaya dai napapapundo an ilegal na sugal, saindang pigtutulod an moral values kaya dapat tunawon an legal asin ilegal na sugal sa saindang provincia.
Pigpahimotikan kan ika-duwang halangkaw na oficial kan Albay na saindang pinapundo an STL nganing dai maka-competencia sa coleccion sa sugal na jueteng.
An oficina rehiyonal kan Bicol PNP yaon sa Ciudad nin Legaspi, dai man ginigibong accion contra sa jueteng envez makusog pa an centralisadong operacion kan sinambit na ilegal na sugal.
An gobierno provincial kan Camarines Sur bukas na sa siisay man na operator kan STL inabot nang sarong taon kan ipasar an resolucion mayong naglalaog na bangkero envez an mahiwas an coleccion iyo an jueteng.
Si gobernador L-Ray Villafuerte an nagsugo na sa PNP Camarines Sur na ipapundo an sinambit na sugal alagad mayo man ginigibong campania an provincial director sa directiva kan gobernador huli ta nag-aalangan sa aki nin politico asin may proteccion pa sa halangkaw na oficial kan Bicol PNP.
