Nagibo ngani kan Congreso an ley na madoble an sueldo kan mga juezes asin procurojador ano ta dai magibo sa mga doctor, dai na kaipuhan na maglansar pa nin sit-down strike ta makakaribok pa, sabi sa mga pahayag ni Dr. Edgar Esplana, director kan Bicol Medical Center (BMC).
An mga doctor padagos na nagkukulang sa nacion huli ta mas prioridad na ninda na magtrabajo sa luwas kan nacion mientras na halangkaw an pig-oopresir na sueldo kun icocomparar sa Filipinas arog kan nagtatrabajo sa BMC nagsusueldo sana nin Pl8,000 cada bulan.
Igwa man kutang Magna Carta benefits sa mga health workers alagad dai na-iimplementar huli ta mayo man ngani nin fondo.
Sinabi ni Esplana na kun joven pa siya matrabajo na sana siya sa abroad huli ta an saiyang basic salary cantidad sanang 26 mil pesos, pigkakaltasan pa bulan-bulan nin buis mala ngani sa bilog na taon l00 mil pesos an pigbabawas sa saiya.
Si Secretary Francisco Duque III kan Department of Health pabor sa dugang na sueldo kan mga health workers yaon ini sa iniciativo kan Congreso, alagad mayo man nin ginigibo para sa dugang na benficios kaya nganing maka-angat an pagbuhay kan mga doctor na-clase na sana nin nursing ngani sanang makatrabajo sa luwas kan nacion na mas halangkaw an sueldo, sabi pa kan director kan BMC.
Kan mga naka-aging taon an mga juezes asin empleados kan corte an naglansar nin sit-down strike sa kahurotan sa gobierno nacional na dugangan an saindang sueldo, nag-accion tulos an Congreso kaya nagpasar sinda nin ley sa dugang na sueldo alagad an hinanakit kan mga doctor dai sinda narereparo kaya nagpaparakulang an doctor sa Filipinas.
An ibang empleados kan hospital kan gobierno na habo nang magpa-sambit kan saindang pangaran nagtuyaw sa Camara-Baja asin Camara-Alta ta an saindang na-iisipan iyo an pagpara-palangkaw kan saindang pork barrel dai naheheling an tamang servicio sa salud.
Igwa man congressman na nagcocondcuir nin medical mission puros sana man ini pogi point na temporario sana man dai naheheling an kakulangan nin mga doctor sa hospital huli ta mayong delihencia.
Sa ngonian an BMC kulang nin 35ng doctor, suroksokan pa an mga paciente kaya an servicio dai maiibitaran na afectado.
