Pili, Camarines Sur -– Dai reconosido kan Sanggunian Panlalawigan kan Camarines Sur an pangaran na Alfelor Highway envez Buhi-Malinao road na nahace an proyecto kan magka-igwa nin joint resolution kan 1998 an LGU Buhi asin Malinao, na sakop kan provincia nin Albay.

        Sa ginibong regular session kan SP Camarines Sur kan Martes na hapon invitado si DPWH Regional Director Orlando Roces asin si 4th Dist. Engr. Amelia Fajardo kan DPWH Camarines Sur nganing hagadan nin paliwanag sa status kan Buhi-Malinao road, si Roces dai nag-atendir envez si Fajardo asin saiyang mga staff sa oficina.

        Sa agenda naka-surat an Buhi-Malinao road na tutukaron sa sinambit na regular session, maging si mga kahapotan ni Ex-officio member Antonio Olano kan PCL Cam. Sur an saiyang apod iyo an Buhi-Malinao road na iyo man an pighahapot ki Fajardo envez an Alfelor Highway na iyo an pigpangaran ni diputado Nancing Alfelor kan cuarto distrito.

        Si Olano, miembro kan Sanggunian Bayan kan Buhi, Camarines Sur pigsabihan si Engr. Fajardo na an sinambit na proyecto sa tinampo narealisar sa pagtarabangan ninda kan LGU Malinao sagcod na nagka-igwa nin joint session sa pagpasar nin resolucion na bukasan an lugar ninda para sa sinambit na highway sagcod na maghanap nin fondo sa gobierno nacional.

        Kan panahon an Congresista na nakakasakop kan Malinao, Albay iyo si diputado Edcel Lagman na nagpabor digdi huli ta mapalipot kan oras nin viaje pasiring sa provincia kan Albay.

        An proyecto kan nasa puesto pa an Bicolanang dating DBM Secretary Emilia Boncodin, nginaran sa Boncodin Highway gikan sa ama kan dating cabinet secretary. alagad kan magdeminter sa gabinte an ginibo ni diputado Alfelor niribayan nin ngaran hali sa saiyang ama na si dipuntong gobernador Felix Alfelor Sr.

        An campo ni Alfelor nagsabi nangyayari ini huli ta an mayoria kan miembros kan SP contra partido kan representante kan cuarto distrito.

75 POR CIENTO NA AN COMPLETION
KAN BUHI-MALINAO ROAD
        Si DE Fajardo nagreport sa Sanggunian Panlalawigan na 75 por ciento na an completion kan proyecto na ginastosan na nin 65 milliones pesos asin an l5 milliones pesos na dugang na fondo iyo an pigpapadagos sa ngonian. Igwa na nin total na 83 milliones pesos.

FONDO KAN PROYECTO HALI
SA GENERAL APPROPRIATION
        Bakong gikan sa pork barrel ni Alfelor an fondo sa sinambit na proyecto envez saiyang pigdisponer hali sa general appropriation kan gobierno nacional, ini base sa mga pahayag sa mga miembros kan junta provincial ni Fajardo. Dai sinda makatao nin target date sa pagtapos kan patrabajo huli ta mag-dedefende sa fondo kan gobierno nacional.

IMPLEMENTACION KAN PROYECTO
MAY COORDINACION SA LGU BUHI
        Pinahimotikan kan oficial kan 4th engineering district na mayo sindang coordinacion sa mga oficiales local kan Buhi huli ta imposibleng mangyari ini ta dai sinda pueding mag-implementar nin proyecto na mayong coordinacion sa LGU. Pigponan an patrabajo kan panahon ni dating alcalde Diones Belza asin maging sa administracion ngonian ni alcalde Rey Lacoste.

        Magigirumduman si Lacoste nagrereclamo kan implementacion huli ta dai lamang pigpapa-isi sa saiyang oficina, alagad ini pinahimotikan ni Fajardo.