Rinibong mga Bicolano an sarabay na maluwas sa Viernes (Pebrero 22) na hapon nganing maglansar nin mga lighting rally asin noise barrage bilang paglaban sa curapcion sa mga halangkaw na oficial kan gobierno asin pagsuporta ki Engr. Rodolfo Noel Lozada Jr., star witness kan nabulilyason ZTE deal.

        Kadakli kan grupo hali sa Social Action Center asin multi-sectoral group sa mga provincias kan Camarines Sur, Camarines Norte, Albay, Sorsogon asin Masbate, an protesta digdi sa Bicol kasabay man kan mahiwas na protesta sa Metro Manila sagcod sa iba pang rehiyon.

        Sa protesta ma-anunciar sinda kun masuporta sa pangapodan na Gloria Resign.

        Digdi sa Ciudad nin Naga papangenotan kan Institute of Politics kan Ateneo de Naga University, Coalition for Bicol Development, Naga City People’s Council, mga estudiantes asin iba pang sectores na nagparticipar na sa mga miting antes ilansar an sinambit na protesta sa Viernes.

        Si Professor Rene Gumba kan Institute of Politics kan Ateneo de Naga University nagsabi sa Bicol Mail na preparado na an saindang grupo asin manlaen-laen na sectores, alagad saiyang piglinaw na dai naka-centro ki Lozada an saindang hiro protesta envez an pangapodan sa paglaban sa curapcion laban sa mga halangkaw na oficial kan gobierno.

        An accion na ini para masusteniran ta an credibility kan satong gobierno gustong sabihon incidental sana si Jun Lozada, alagad sinda nagtutubod na senciro siya sa sinasabi asin may katutoanan an saiyang sinasabi, segun pa sa mga pahayag ni Gumba sa BM.

        An katuyohan kan protesta sa tahaw kan mawot na raoton an credibilidad kan star witness an punto pig-oorolayan an curapcion sa laog kan gobierno mientras na an pangapodan kan grupo na pundohon na an curapcion.

        Sinda naglansar na nin signature campaign bilang suporta na dai nagsusulo si Lozada sa campania laban sa curapcion, an lugar kan kan firermahan nasa Ateneo de Naga University, asin sa Universidad de Santa Isabel ini digdi sa Naga asin igwa man ibang lugar sa ibang provincias asin ciudades kan kabikolan.

SP NAGPASAR NIN RESOLUCION
NA NAGSUSUPORTA KI LOZADA
        An Sanggunian Panlungsod kan Ciudad nin Naga nagpasar nin resolucion na nagsusuporta sa paglangtad na ni Lozada sa Senado nganing ibuyagyag an anomalia sa ZTE deal na kun haen kun dai nabulilyaso si contrata milliones dollares an envueltong cuarta na pueding makurakot kan halangkaw na mga oficial kan gobierno nacional.

PNP NAG-ALERTO SA GIGIBOHON PROTESTA SA VIERNES
        An Bicol PNP sa pamamayo ni OIC Regional Director Roberto Bondoc nagpaluwas nin directiva na maging alerto an awtoridad sa gigibohon na protesta nganing imanenir an paz y orden.

        Alagad an organisacion na maparticipar sa protesta an nag-asegurar na dai dapat mahadit an awtoridad huli ta an saindang rally pangapodan sana sa gobierno na pundohon na an curapcion.