An local na gobierno kan Ciudad nin Naga sa dai mahahaloy marerealisar na an pag-implementar kan ordenanza nganing magpalista sa barangay council asin magka-igwa nin sadiring ID susog sa ordenanza na ina-probaran kan taon 1993 na pig-padrenohan ni Consejal Julian Lavadia Jr.
Caption: KATUYOHAN KAN ID SYSTEM PIGPALIWANAG - Sa retrato si Manuel Lito Martinez Jr. (nasa too) MMO Social Program Coordinator asin sa wala si Ms. Marylyn Ortiz, MMP Card Coordinator President nag-atubang sa media sa pagpaliwanag kan pag-producir ninda kan Privilege Card sa registradong votantes kan ciudad. Sinda an ma-producir kan ID card na libre.
Alagad pakatapos kan 15 anyos pueding ma-implementar man giraray, magkaka-igwa sana nin bagong ideya sagcod na mapanday nin bagong ordenanza na papadrenohan ni Consejal John Bongat.
Pigpaliwanag ni Bongat an saiyang propuestong ordenanza inaapod na Innovative Service Value Entitlement (i-Serve) Project mas na-iiba sa orihinal na ordenanza ni Lavadia huli ta sarong privilege card suhay man sa pig-iintruducer kan MMO Card Corporation, na sarong credit card.
Bako gabos na residentes o registradong votantes magkaka-igwa kan ID system envez si mga indigent sana o pobreng namamanuan ta kun gabos dai kakayahon kan fondo kan LGU, sabi pa ni Bongat.
An may kapot nin i-Serve calificado sinda kan mga benificios na pigtatao kan ciudad siring kan libreng consultacion, medicina sa City Hospital asin sa City Health Office, si mayong-mayo libre na an death certificate na pig-iisyu kan oficina kan Civil Registrar asin si mga miembros kan Quality Universal Elementary and High School Education (QUEEN).
An consejal enot nang nag-probar na palusoton an ordenanza sa ginibong regular session kan Pebrero l2, 2008, alagad pigcontra kan mayoriang miembros huli ta dai pa na-agi sa tamang proceso o dapat magpa-apod muna nin public hearing.
Pigconfirmar na ni Bongat na matalaan siya nin public hearing sa enot na semana kan Marzo 2008.
Mientras tanto, pig-aadalan pa kan sanggunian an propuesto kan MMO Card Corporation na sinda an mag-producir kan ID System. An oficiales kaini enot nang nag-atubang sa press conference sa pagtubod na mapaparikas na an resolucion kan SP an saindang pig-aalok na sinda an ma-producir nin mga ID na libre.
