HARAYO na an posibilidad na may maglaog pa nin bagyo sa Philippine area of responsibility ngonian na bulan nin Pebrero asin Marzo bakong arog kan nagtalikod na taon, maging mayo nang peligro na may mabilog pa nin tropical cyclone.

        Si Corazon Lotibo Samar, weather forescaster kan Philippine Atmospheric, Geophysical and Astronomical Services Administration (Pagasa) sa Camarines Sur nagsabi na kun padagos an pagbulos nin uran sa kabikolan ini efecto pa kan La Niņa ngonian na first quarter alagad mayormenteng na-aafectaran iyo an central asin eastern pacific, kaya ngani ikog sana an namamating pag-uran digdi sa Camarines Sur asin sa iba pang parte kan rehiyon cienco.

        Kan Pebrero kan nagtalikod na taon an ibang lugar sa Visayas asin Mindanao iyo an inabot nin mga tubig baha, alagad ngonian iyo na an Bicol na kun haen warak-warak an makusog na pag-uran mala ngani an inabot na nin tubig baha iyo an banwaan kan Buhi asin Bato asin pagtaraid na banwaan kan cuarto distrito, Ligao, asin Legaspi City, sabi pa kan Pagasa.

        Kabali sa afectado kan La Niņa iyo an eastern Philippines sa mga provincias kan Catanduanes, iba pang lugar kan Bicol, Aurora, Cagayan, Surigao del Sur, Surigao del Norte, Southern Leyte asin Eastern Samar.

        Nagpatanid pa an oficina kan Pagasa sa Camarines Sur sa mga residentes na nasa kaba-ban na lugar na maging alerto sa mga pagbaha asin landslides.

        An weather bureau kan Camarines Sur nagsabi pa na an La Niņa pawara alagad dai man hinahali an mga pagbulos nin uran sa mga bulan kan summer.

        Mientras tanto, sagcod na yaon pa an high pressure area sa South China Sea padagos pang mamamatian an taglipot sagcod sa huring semana kan Pebrero asin mahahali na sa paglaog kan masunod na bulan.