Pili, Camarines Sur -– An Department of Agriculture sa Bicol naghahadit sa paghuros nin supply nin bagas sa rehiyon sa mga masunod pang bulan mientras na an report kan Philippine Atmospheric, Geophysical and Astronomical Services (Pagasa) nag-declara na an La Niña weather phenomenon magpapadagos asta sa bulan nin Junio ngonian na taon.
Caption: MAHIWAS NA KAOMAHAN sa Minalabac, CSur enterong linantopan nin tubig baha kadakli madali ang anihon si paroy. Si sobra sa duwang semanang pag-uran iyo si causa kan mga pagbaha sa CSur asin Albay. (Retrato cortecia ni Jun Collantes- DA-RV)
Pinaheling sa Bicol Mail ni Ms. Emily Bordado, jefe kan information office kan DA regional office an report kan Pagasa na an La Niña phenomenon magdadanay sa Bicol asin sa iba pang mga rehiyon sagcod sa Junio, ngonian ngani malaog na an panahon nin tag-init dakula na si destroso sa kaomahan kabali na si tinanum na mais asin sa gugulayon huli kan mahiwas na tubig baha.
Si DA regional director Jose Dayao an nag-aandaman nin tabang sa ginatos na na-afectaran nin mga paraoma sa Bicol nganing makatanum tulos nin paroy sa paagi nin paghanap nin certified seeds.
Sa pinaka-huring damaged report kan DA sa mga kaomahan pigpahayag na nagsakat na sa Pl22,750,710 an production loss sa mga tinanum na paroy asin ini hali sa l8,814 na hectarias sa 40,603ng na hectaria sa kaomahan kan provincias kan Albay, Camarines Sur asin Sorsogon. Dai pa nasumiter nin damaged report an Camarines Norte, Masbate asin Catanduanes.
An report sa destroso sa maisan nagsakat na sa P10,690,00 ini sa mga provincias nin Albay asin Camarines Sur. Enterong nadestroso si l,754 na hectarias asin an production loss pigkakarkulo sa 2,909 metrico tonelada.
Sa natipon na damaged report hali sa provincias kan Albay, Camarines Sur asin Camarines Norte sa lado nin producto nin gugulayon maabot sa Pl4,421,577 si production loss, sabi pa kan jefe kan DA information office.
Sagcod kasuodma nag-abot na sa total na P147,864,287 an damaged report dai pa kabali si destroso sa livestock na nag-abot sa cantidad P553,944. Piglalaoman na malangkaw an cantidad kan pierdeda kan paraoma hali sa iba pang mga banwaan asin provincias kan Bicol mientras na ini pighahalat kan DA regional office.
Mientras tanto, maabot sa 25 mga barangay sa Albay an na-afectaran kan tubig baha asin landslide mala ngani nagdeclara na nin estado nin calamidad an gobierno provincia kan Albay.
Sa Camarines Sur 17ng mga barangay kan municipio nin Bula, kabali an Municipal Hall an sagcod sa ngonian yaon sa hararum na tubig baha. Kabali pa an mga barangay kan Buhi, Baao, asin Nabua.
Kadakili kan mga escuelahan sa elementaria asin high school sa escuelas publica an mayo pa nin clase huli ta lantop pa nin tubig an mga classroom.
An Department of Education nagtao nin awtorisacion sa school principal na pueding mag-suspendi nin clase dawa anong oras huli kan calamidad.
Sa panahon kan padagos na pag-bulos nin uran si gobernador L-Ray Villafuerte kan Camarines Sur pinahiro an Provincial Disaster Coordinating Council nganing matabang an afectado kan tubig baha sagcod na nagtao nin relief goods.
