Apesar kan aseguracion sa Naga City Peace and Order Council (NCPOC) ni OIC City Director P/Sr. Supt. Edwin Jose Nemenzo kan Naga City Police Office na sa laog nin 24 oras pueding mapapundo an bola nin jueteng o maging ma-arestar an correador sa sinambit na sugal nagbirik naman siyang pahayag envez saiyang inako na nadidificilan siya huli kan an iba sa miembros kan PNP digdi an may simpatia sa operacion kan sugal.

        Hinapot siya ni bise alcalde Gabriel H. Bordado Jr. kun ano na an nangyaring pangako sa enot na pag-atendir sa POC meeting na kayang-kayang mapuho an sugal sa laog nin 24 oras na sa aseguracion mayo siyang sasantuhon na oficial kan PNP. Inako kan jefe kan NCPO na nagpapadagos an coleccion sa saiyang area of responsibility asin magpapadagos an saiyang campania laban sa sugal.

        Si Bordado, acting chairman kan NCPO nagsaludo sa OIC City Director sa pag-ako na may jueteng sa Naga, huli ta bakong hepocrito sa pagbuyagyag na may miembros kan PNP sa ciudad an nagsisimpatia sa sugal.

        An saro sa miembro kan NCPOC, si Roy San Ramon nagrerepresentar kan media sector pigtukdo ki Nemenzo na may nangyayaring pagbola sa barangay Pacol, alagad dai niya ini pig-confirmar envez nakatalaan na aramon kan saiyang pag-iriba antes mag-accion.

        Hinapot siya kan bise alcalde kun tano ta nagpapadagos an jueteng apesar kan pangako na kayang mapapundo sa laog nin 24 oras kaya pig-acusaran kan ibang oficiales kan ciudad an jefe kan PNP na pigbuladas sana an oficiales local sa campania contra sa sinambit na sugal.

        An correador sa jueteng may minsan nagpapataya pa sa atubangan kan NCPO alagad dai man pigdadakop. Sa dakul na numero nin mga correador sa sugal solamente anom pa sana an na-arestar kan jepatura.

        An local na gobierno sa pamamayo ni alcalde Jessie M. Robredo haloy na an panindugan contra sa ano man na pagdanay kan jueteng sa arin man na barangay kan ciudad, alagad igwa sa barangay Pacol an pigbabaliwala sana kan NCPO.