An padagos na pagbulos nin uran sagcod nagcausa nin tubig baha saro sa naging dahilan kan multi- sectoral nganing i-uktava an mga lighting rally asin noise barrage digdi sa Bicol kan nakaaging Pebrero 22 envez pigtalaan na sa Pebrero 29 kasabay na sa mga rally sa Manila asin iba pang rehiyon bilang protesta sa curapcion sa presenting administracion ni PGMA sagcod na-ngangapodan sa campania laban sa curapcion asin suporta ki Engr. Rodolfo Noel Lozada Jr., star witness kan nagpalyar na NBN-ZTE deal.
Si Professor Rene Gumba kan Institute of Politics kan Ateneo de Naga Univeristy nagsabi sa Bicol Mail na idadagos na kan manlaen-laen na sector an saindang protesta sa Pebrero 29 asin an pinakahuring nagconfirmar na maparticipar iyo an Integrated Bar of the Philippines (IBP) Camarines Sur chapter.
An mga escuelahan na activong maparticipar iyo an Ateneo de Naga University, Universidad de Sta. Isabel, Naga Collge foundation, Mariners Polytechnic College Foundation asin iba pang organisacion nin student government gikan sa ibang mga colegio sa Ciudad nin Naga.
Masabay digdi sa Bicol iyo an mga provincias kan Sorsogon, Albay asin Camarines Norte na kun haen an naghihiro iyo an mga social action sector, mga escuelahan, simbahan asin dakul pang organisacion civico.
Naglansar sinda nin signature campaign para sa suporta ki Lozada na kinakaipuhan kisiera l20 mil na firma bilang pang sabat man sa l20 milliones dolyares na kickback kan mga nakinabang sa NBN-ZTE deal.
Kabali pa sa nagsuporta sa protesta iyo an Naga City People’s Council, Coalition for Bicol Development, mga militanteng organisacion, women’s group, labor sector, paraoma asin dakul pang grupo.
An mga militanteng grupo sa Ciudades kan Naga, Sorsogon asin Legaspi an naglansar kan saindang pagcomemorar kan ika-22 na aniversario kan EDSA I asin saindang hinuhorot na magdemiter na sa puesto si Presidente Gloria Macapagal-Arroyo huli kan ramog-ramot na nin curapcion an saiyang administracion.
Saindang pigsusuportaran si Jun Lozada na nagsasabi nin totoo sa isyu kan NBN-ZTE deal.
Kabali sa saindang isyu iyo an nagpapadagos na extra judicial killing na mayong resulta an investigacion kan mga awtoridad.
