An National Food Authority (NFA) sa Camarines Sur dai pa masimbag an kahapotan kan posibleng pagkulang-kulang nin stock nin bagas sa provincia mientras na igwa na sana sinda nin l8,000 na sakong bagas na stock sa bodega kan NFA Provincial Office.

        Ini sagcod na sanang sarong semana, sabi sa mga pahayag ni Provincial Manager Jose Danilo Nieves sa enttevista kan Bicol Mail kasuodma sa paagi nin telepono.

        Walo (8) nang mga local na gobierno an nag-utang nin sinakong bagas asin sa cada LGU igwang sangatos na sakong bagas an pigkokoa nganing itaong ayuda sa mga familia na afectado pa kan tubig baha.

        Alagad sinabi kan provincial manager na igwang alocacion na 25 mil na sakong bagas sa NFA Camarines Sur na Vietnam rice na pigtagama kan saindang oficina rehiyonal sa Ciudad nin Legaspi.

        Nagparalangkaw na an precio kan commercial rice nag-cacantidad na nin sagcod sa 28 pesos cada kilo efecto kan piglalaoman na pagkukulang nin supply nin bagas huli kan milliones pesos na destroso sa paroyan kasunod kan mga nangyaring tubig baha.

        An NFA padagos sa pag-supply nin bagas sa saindang acreditadong tiendahan sa mga mercado afuera kan pigkokoa man na sinakong bagas kan mga LGU.

        Nahahadit an consumedores sa supply nin bagas mala ngani naglangkaw precio huli ta ciertong mahuros an produccion mientras na igwa man na oportunistang nagpapabakal nin NFA rice sa halangkaw na precio sa dapat na P18.25 cada kilo.

        Pigbuyagyag pa ni Nieves sa BM na may walo na sindang nagkadarakop huli kan overpricing sa pigpakong precio kan NFA rice, ini hali sa Sipocot, Ragay asin iba pang municipalidad.

        Nakatalaan na cancelarong kan NFA an saindang accreditation oras na ma-provaran na nagbalga sa pigpakong precio, sabi pa kan NFA provincial manager.